Сирияда холерага каршы массалык эмдөө иштери башталды

Журналист: АЙСУЛУУ ТАЛАНТ

21.12.2022, 15:12

14491

дүйнө жүзүндө

Сириянын түндүк-чыгышындагы бир катар аймактарда холера оорусун алдын алуу үчүн массалык эмдөө иштери башталды. Анын максаты – кыска убакыттын ичинде дээрлик 400 миң адамды бул коркунучтуу ооруга каршы эмдөө. Бул тууралуу МИР 24 телеканалы билдирди.

Бардык курактагы жергиликтүү тургундарга вакцинанын оозеки дозасы берилет. Бул ишке алыскы аймактарда иштеген үч эмдөө борбору жана 57 көчмө эмдөө бригадасы катышууда. Жалпысынан жумушка 360тан ашык дарыгер жана медайым тартылган.

«Биздин ичүүчү суулардын көбүндө курттар жана микробдор бар. Азыр ушул нерседен улам пайда болгон холерага каршы эмдөө жүргүзүп жатабыз. Ал эми белгисиз булактардан келген цистерналардагы суу адамдарда ич өткөк, оору жана эпидемияларды пайда кылууда», - дейт Хасака шаарынын тургуну Абу Ибрахим.

Сириянын Саламаттыкты сактоо министрлиги холера оорусунун жайылышы тууралуу 1-сентябрда расмий жарыялады. Бүткүл дүйнөлүк саламаттыкты сактоо уюмунун маалыматы боюнча, өлкөдө бул оорудан 92 адам каза болуп, 35 миңден ашуун холера оорусу катталган.

Булак: NazarNews.kg