АКШ жана Израиль 28-февралда баштаган согуштун 19-күнү уланууда. Кол салуулардын натыйжасында өлкөнүн саясий жана аскердик жетекчилигине олуттуу сокку урулду. Жогорку кызматтагы бир катар ирандык жетекчилер каза болуп, бул Ирандын башкаруу системасында олуттуу боштуктарды жаратты.

Эң чоң окуя Ирандын жогорку лидери Али Хаменейдин өлтүрүлүшү болду. 1989-жылдан бери өлкөнү башкарып келген Хаменей 86 жашында 28-февралда Тегерандагы резиденциясына АКШ жана Израиль жасаган аба соккусунун натыйжасында каза тапкан. Анын узак мөөнөттүү башкаруусунда коопсуздук түзүмдөрүн бекемдөө жана Ирандын аймактагы таасирин кеңейтүү негизги багыттардын бири болгон.
Кол салууларда Ирандын коопсуздук жана саясий элитасынын башка маанилүү өкүлдөрү да каза болгон.

Улуттук коопсуздук боюнча жогорку кеңештин катчысы Али Лариджани 17-мартта Пардис аймагындагы чабуул учурунда уулу жана жакын кызматкери менен кошо каза тапкан. Ал мурда Ислам революциясынын сакчылар корпусунун командири болуп иштеген жана өзөктүк сүйлөшүүлөрдүн негизги катышуучуларынын бири катары белгилүү болгон.

Ирандын чалгын министри Исмаил Хатиб 18-мартта Израилдин соккусунан каза болгон. Ал диний ишмер жана катуу саясатты колдогон жетекчи катары белгилүү болуп, узак убакыт Хаменейдин жакын чөйрөсүндө иштеген.

Өлтүрүлгөн жогорку кызматтагы адамдардын тизмеси:

•    Али Хаменей – Ирандын жогорку лидери;
•    Али Шамхани – Ирандын коргонуу кеңешинин катчысы;
•    Мохаммад Пакпур – Ислам революциясынын сакчылар корпусунун командири, генерал-майор;
•    Абдулрахим Мусави – Куралдуу күчтөрдүн Башкы штабынын начальниги, генерал-майор;
•    Азиз Насирзаде – коргоо министри, бригадалык генерал;
•    Маджид Ибн Реза – коргоо министри (Насирзаденин ордуна келген), бригадалык генерал;
•    Мохаммад Ширази – жогорку лидердин аскердик кеңсесинин башчысы, бригадалык генерал;
•    Хусейн Джабаль Амелиан – Коргонуу инновациялары жана изилдөөлөр уюмунун (SPND) башчысы, бригадалык генерал;
•    Реза Музаффари Ниа – SPNDнин мурдагы башчысы, бригадалык генерал;
•    Мохсен Даррабаги – Башкы штабдын логистика боюнча орун басары, бригадалык генерал;
•    Гуламреза Резаян – полициянын чалгын кызматынын башчысы, бригадалык генерал;
•    Бахрам Хусейни Мутлак – Башкы штабдагы операциялык пландоо жетекчиси, бригадалык генерал;
•    Мохаммад Басери – чалгын министрлигинин жогорку кызматкери;
•    Салех Асади – «Хатам аль-Анбия» штабынын чалгын кызматынын башчысы;
•    Гуламреза Сулеймани – «Басидж» күчтөрүнүн командири, бригадалык генерал;
•    Али Лариджани – Улуттук коопсуздук боюнча жогорку кеңештин катчысы;
•    Исмаил Хатиб – Ирандын чалгын министри.

Мындай көлөмдөгү жоготуулар Ирандын саясий жетекчилигинде да, аскердик башкаруу чынжырында да олуттуу боштуктарды жаратат. Аналитиктердин айтымында, негизги фигуралардын, айрыкча жогорку лидердин жана коопсуздук блогунун өкүлдөрүнүн бир убакта жок кылынышы өлкөдөгү күчтөрдүн балансын өзгөртүп, аймактагы чыңалууну дагы күчөтөт.