Аз күн мурун КСДПнын саясый кеңеши Сооронбай Жээнбековдун талапкерлигин жактырышкан, эми партиянын съезди аркылуу толук кандуу бекисе, анан БШКдан президенттик шайлоого талапкер катары күбөлүк алат. Мына ушундан кийин ал премьер-министрлик кызматын өткөрүп береби? Же Конституцияда көрсөтүлгөн негизде иш-аракетин уланта береби?

Айтмакчы, эмитен эле саясый чөйрөдө ар кандай сөздөр тарай баштады. «Сооронбай Жээнбеков өкмөт башчылыктан кетпесе, ыйгарым укуктарын шайлоого чейин ашыкча пайдаланат, административдик ресурсту коддонот ж.б.» деген. «Макул» дейли.

Эгер келечекте Соке кызматын тапшырып, шайлоо иштери менен шугулданып кетсе, өкмөттө, дегеле бийлик бутагында кандай кадрдык өзгөрүүлөр күтүлүшү мүмкүн? Албетте, эртеңки боло турган кундү эч ким так кесе айталбайт. Бирок, анализ кылуу менен ой калчап, Акүйдүн айрым лөктөрүнүн тымызын маалыматтарына таянып, аныгында, «окшоштурулган картинаны» алып чыксак болот.

Маселен, Сооронбай Жээнбеков премьер-министрлик кызматынан кетсе, ордун Бишкек мэри Албек Ибраимов ээлеп, 1-вице-премьерликке Сапар Исаков келиши мүмкүн. Ал эми президенттик аппараттын башчылыгына Абдил Сегизбаев барып, УКМК төрагасына Улан Исраиловдун дайындалышы, ИИМ башчылыгына Сүйүн Өмүрзаковдун бекиши болжонууда. Мындай чечим бир гана президент Алмазбек Атамбаевдин каалоосу аркылуу ишке ашса керек. А парламенттеги көпчүлүк коалиция адатынча «хоп майли» деген таризде жүгүнүшүп, жогору жактын буйругун каалагандай аткарышары ажеп эмес. Мурдагы практикаларды эске алып көргүлө.

Кудай жалгап, бийлик мураскеринин хан тактыга аттанганын элестетип атабыз. Кызыгы, айрым билермандар «Жээнбеков түштүктөн кыйратып добуш ала албайт, түндүк болсо регионалдык көз караш менен колдобойт» дешүүдө. Андай эмес, учурда көпчүлүк коалицияда КСДП, «Кыргызстан», «Бир Бол» фракцияларынын депутаттары, олигархтары, партиялаштары жапырт чуркоо менен жетиштүү добушту алышууга жан үрөшөт. Анүстүнө Атамбаевдин деле саясый рейтинги азырынча жогору – ушул жагынан да Сокеге кыйла тирөөч болот. Көпчүлүк элдин катмары азыр туруктуулукту, тынчтыкты каалашат. А мындай көрүнүшкө бүгүнкү бийликтин салымы чоң болду. Кыскасы, Алмазбек Шаршеновичтин каалоосуна, эркине жараша кийинки президент шайланат.

Булак: “Азия Ньюс”