2020-жылдын 1-декабрына карата жөлөкпул, кенемте түрүндөгү социалдык төлөмдөрдү 637 миң 200 адам алган. Бул тууралуу брифинг учурунда эмгек жана социалдык өнүктүрүү министри Ализа Солтонбекова билдирди.

Анын айтымында, 637,2 миң адамдын ичинен "үй-бүлөгө көмөк" жөлөкпулун 334 миң бала алган.

"Ай сайын 3 миң сомдун тегерегиндеги жөлөк пулду 94 миң 100 жаран алат. Жыл башынан бери кош бойлуу боюнча жөлөкпул 32 миң адамга, сөөк коюу боюнча жөлөкпул 2 миң 800 жаранга төлөнгөн", - дейт ал.

Солтонбекова кошумчалагандай, ай сайын 25 категориядагы 40 миң 100 адамга жеңилдиктердин ордуна 1 миңден 7 миң сомго чейинки каражат берилет.

Булак: NazarNews.kg