Президент Сооронбай Жээнбеков "Кыргыз Республикасынын көз карандысыздыгынын 30 жылдыгын белгилөөгө даярдык көрүү жөнүндө" жарлыкка кол койду. Бул туурасында мамлекет башчынын маалымат кызматы кабарлады.

Маалыматка ылайык, КРдин Жогорку Совети 1991-жылдын 31-августунда Кыргызстандын мамлекеттик көз карандысыздыгы жөнүндө декларацияны кабыл алган. Ага ылайык, өлкө көз карандысыз, эгемендүү, демократиялык мамлекет деп жарыяланган.

Жарлыктын негизинде токтом кабыл алынды.

Өкмөткө төмөнкүлөр сунушталды:

• Кыргыз Республикасынын көз карандысыздыгынын 30 жылдыгын белгилөө менен байланышкан иш-чараларды даярдоо жана өткөрүү боюнча уюштуруу комитетин түзүү;
• Даярдоо жана өткөрүү боюнча иш-чаралардын планын 2020-жылдын 1-декабрына чейин бекитүү;
• Аталган иш-чараларды даярдоо жана өткөрүү үчүн зарыл болгон финансылык каражаттарды республикалык бюджеттен бөлүүнү кароо;
• Жарлыктын аткарылышын көзөмөлдөө президенттин аппаратынын жетекчисине жүктөлсүн.

Булак: NazarNews.kg