Тажикстанда сот 30 жаштагы Косим Оевге аялга асылганы үчүн 406 сомони (40 доллар) айып пул салды. Бул тууралуу Душанбе шаардык ички иштер башкармалыгы билдирди.

Тажикстанда бул – асылуу үчүн жаза берилген алгачкы учур.

Окуя быйыл 12-июлда болгон. Жабырлануучу аял “Фейсбуктагы” баракчасына көчөдө такси күтүп турганда Mercedes-Benz үлгүсүндөгү автоунаа айдаган жигит токтоп тийишкенин, интимдик кызмат үчүн 100 доллар сунуштаганын, баш тартканда сөккөнүн жазган.

“Эмне үчүн эркектер өзүлөрүн ушундай алып жүрүшөт? Алардын эже-карындаштары жокпу? Апалары жокпу? Аялдары жокпу? Мындай айбандар жазалансын. Бир дагы айбан мага, мага эле эмес бардык аялдарга минтип сүйлөөгө укугу жок!”, – деп жазган ал.

Милиция кызматкерлери Косим Оевди 28-июлда кармашкан. Жергиликтүү басылмалар жигитке майда бейбаштык үчүн административдик протокол түзүлүп, 40 доллар айып пул салынганын кабарлашты.

Эки жыл мурун душанбелик кыз-келиндер калаа мэри, президенттин уулу Рустами Эмомалиге кайрылып, көчөдө асылган эркектерден коргоону жана аларды жазалоону сурашкан. Мэрия бул көйгөйдү чечүүгө убада бергени менен эч кандай чара көрүлгөн эмес.

Булак: “Борбор Азия жаңылыктар кызматы”