Тажикстандын Россиядагы Эмгек министрлигинин өкүлчүлүгү өлкөнүн жарандарына жана эмгек мигранттарына социалдык тармактарды жана мессенджерлерди колдонууда этият болууга чакырды.

Маалыматка ылайык, айрым тыюу салынган топтор жана уюмдар социалдык тармактар, мессенджерлер жана башка байланыш каналдары аркылуу жарандарды мыйзамсыз ишмердүүлүккө тартууга аракет кылышы мүмкүн.

Бул үчүн ар кандай сунуштар, жалган убадалар, акча которуу же жардам көрсөтүү тууралуу өтүнүчтөр колдонулары айтылды.

Жарандарга бейтааныш адамдар жана шектүү топтор менен байланыш түзбөө, мыйзамсыз ишмердүүлүккө чакырыктарга жооп бербөө, белгисиз адамдарга жана уюмдарга акча которбоо, ошондой эле экстремисттик же террористтик мүнөздөгү материалдарды таратпоо сунушталды.

Өкүлчүлүк террористтик жана экстремисттик уюмдардын ишмердүүлүгүнө катышуу, аларды каржылоо, акча которуу, адамдарды тартуу жана башка көмөк көрсөтүү кылмыш жоопкерчилигине алып келиши мүмкүн экенин эскертти.

Ошондой эле Тажикстанда ишмердүүлүгүнө тыюу салынган уюмдар жана кыймылдардын тизмеси жарыяланды. Алардын арасында ПИВТ, «Аль-Каида», «Хизб ут-Тахрир», «Группа 24», «Исламское государство», «Джабхат ан-Нусра», «Ансоруллох», Pamir Daily News жана «Новый Таджикистан 2» бар.

Мындай учурларга туш болгон жарандарга Россиянын Федералдык коопсуздук кызматына (ФСБ) +7 (495) 224-22-22 жана 8-800-224-22-22 телефондору аркылуу, ошондой эле Ички иштер министрлигине 102 номери же 8-800-222-74-47 «ысык линиясы» аркылуу кайрылуу сунушталды.