Токтогулда адам өлтүрүүгө шектүү үчкиши кылмыштын изи сууй электе кармалды. Бул тууралуу Жалал-Абад облустук милициясы кабарлады.

Окуя 28-февраль күнү саат 13:57 чамасында катталган. Анда Токтогул районундагы үйлөрдүн биринен киши колдуу болгон 35-40 жаштагы адамдын сөөгү табылган.

Милиция ыкчам тергөө иш-чараларын жүргүзүп, Токтогулдун 40 жаштагы жана Таластын Бакай-Ата районунун 35 жана 36 жаштагы тургундарын кармаган.

“Алар көрсөтмөсүндө спирт ичимдигин ичип отурганда сөз талашып уруша кетип, үчөөлөп сабап коюшканын, андан кийин окуя болгон жерден кетип калышкандыктарын билдиришкен”, - деп жазылган маалыматта.

Факты райондук милициянын кылмыштардын бирдиктүү реестрине “Адам өлтүрүү” беренеси менен катталып, соттук-медициналык экспертиза дайындалган. Учурда тергөө амалдары жүрүүдө.

Булак: NazarNews.kg