АКШнын президенти Дональд Трамп Нури аль-Маликинин Ирактын премьер-министри болушуна каршы чыгып, эгер ал дайындалса, Вашингтон өлкөгө жардам берүүнү токтото турганын билдирди.

“Мен Ирактын улуу өлкөсү абдан жаман тандоо жасап, Нури аль-Маликини кайрадан премьер-министр кылып алып келиши мүмкүн деп уктум. Малики акыркы жолу бийликте турганда, өлкө жакырчылыкка жана башаламандыкка баткан. Мунун кайталанышына жол берүүгө болбойт”, – деп жазган ал шаршемби күнү Truth Social социалдык тармагындагы баракчасына.

Трамп белгилегендей, эгер аль-Малики дайындалса, АКШ Иракка жардам бербейт. АКШнын жардамысыз Ирактын ийгиликке, гүлдөп-өнүгүүгө же эркиндикке эч кандай мүмкүнчүлүгү болбойт.

2025-жылдын аягында Ирак парламенти Хейбат аль-Халбусини төрага кылып шайлаган. Өлкөнүн конституциясына ылайык, кийинки 30 күндүн ичинде парламент мүчөлөрү республиканын президентин шайлашат, ал андан кийин эң чоң коалицияга премьер-министрликке талапкерди көрсөтүүнү тапшырат. 24-январда Ирак парламентинде көпчүлүктү түзгөн эң ири шиит партияларынын коалициясы – “Координациялык кеңеш” мурдагы премьер-министр Нури аль-Маликини жаңы премьер-министрликке көрсөткөн.

Ирак конституциясына ылайык, президенттик кызматты күрт, премьер-министрди шииттерден, ал эми парламенттин спикерин суннилер ээлеши керек.

Аль-Малики 2006-жылы Саддам Хусейндин режими кулагандан кийин Ирактын премьер-министри болуп, 2014-жылы кызматтан кеткен. Бирок, кийинки жылдары ал Ирактын саясий аренасындагы таасирин сактап калган.