АКШнын президенти Дональд Трамп сунуштап жаткан «Тынчтык кеңеши» башында Газа секторуна байланыштуу демилге катары айтылган. Бирок батыш маалымат каражаттарындагы маалыматтарга караганда, бул түзүм бара-бара БУУнун Коопсуздук кеңешине атаандаш же аны алмаштыра турган орган катары каралууда.

Франциядагы Эл аралык жана стратегиялык изилдөөлөр институтунун (IRIS) изилдөөчүсү, мурдагы америкалык дипломат Джефф Хокинстин айтымында, бул демилге БУУнун көп тараптуу эл аралык системасына түздөн-түз коркунуч жаратат.

Трамптын «Тынчтык кеңешинин» уставында азыркы эл аралык институттар натыйжасыз экени айтылып, алардан баш тартууга кайраттуулук керектиги белгиленет. Бул, эксперттердин баамында, БУУга карата ачык сын. Трамп өзүн бул кеңештин биринчи төрагасы катары көрүп, өтө кең ыйгарым укуктарды алууну көздөйт.

Джефф Хокинс бул тууралуу: “Трамп тынчтыкты өзү башкаргысы келет. Башкалар же кошулат, же мажбур болот. Ал эми чечүүчү сөз өзүндө болот”, - деп белгиледи.

Бул кадам MAGA идеологиясы – “Америка биринчи, БУУга акча коротпойлу” деген протекционисттик багыт менен шайкеш келет. Буга мисал катары Трамптын АКШны БУУнун 30дан ашык түзүмүнөн чыгарган чечимин келтирүүгө болот.

Вашингтон «Тынчтык кеңешине» ондогон өлкөлөрдү чакырган. Маалыматтарга караганда, кеңештин туруктуу мүчөлүгү үчүн миллиарддаган евро талап кылынууда. Айрым лидерлер макул болсо (мисалы, Виктор Орбан), көптөгөн мамлекеттер бул демилгеге этият мамиле кылууда. Франция ачык эле баш тартты. Ага жооп катары Трамп француз шараптарына 200% бажы салыгын киргизүү менен коркутту.

Эксперттердин пикиринде, бул дипломатия эмес, басым көрсөтүү катары бааланууда. Россия да БУУнун Коопсуздук кеңешиндеги вето укугун Трамп көзөмөлдөгөн органга алмаштырууга шашылбайт. Бирок Кремль БУУнун алсырашын пайдалуу көрүшү мүмкүн.

Жыйынтыгында, «Тынчтык кеңеши» идеясы дүйнөлүк тынчтыкты чыңдоодон көрө, эл аралык тартипти жеке саясий амбицияларга баш ийдирүү аракети катары сыпатталууда.