АКШ президенти Дональд Трамп тарыхта бир дагы саясатчыга ага жасалгандай жаман мамиле болбогонун билдирди. Шаршембиде АКШ Конгрессинин мүчөсү Эл Грин Өкүлчүлүк палатасында сөз сүйлөп жатып Дональд Трампка импичмент жарыялоого үндөгөн.

17-майда Нью-Лондон шаарында Жээк коргоо академиясынын бүтүрүүчүлөрүнүн алдында сөз сүйлөп жатып, Трамп ФБР директору Жеймс Комини отставкага кетиргенден кийин Акүйдө жаралган кырдаал тууралуу айтып берди.

Коми 2016-жылдагы шайлоо кампаниясы учурунда Трамптын штабы менен Кремлдин ыктымалдуу байланышы тууралуу маалыматты иликтөөнү жетектеген. Февралда президенттин улуттук коопсуздук кеңешчиси Майкл Флинн Трамптын инаугурациясына чейин орусиялык элчи менен байланышкандыгы үчүн отставкага кеткен.

АКШ Сенатынын чалгындоо жана юридикалык комитети, ошондой эле Өкүлчүлүк палатасын көзөмөлдөө комитети Жеймс Коминин иштен алынышы тууралуу материалдарды сурашкан. Буга чейин америкалык басылмалар Трамп Коми менен жолугуп, иликтөөнү токтотуу боюнча суранганын маалымдашкан. Акүй айыптоолорду четке кагууда.

Чалгындоо комитети Орусия боюнча маселени угуу үчүн ФБРдин мурдагы директорун чакырды.

Булак: ".centralasian.org"