Түркиянын Кахраманмараш шаарында Кыргызстандын куткаруучулары издеп-куткаруу иш-чараларын жүргүзүүнүн натыйжасында 8 адамдын жансыз денесин таап чыгарып беришти. Бул тууралуу ӨКМдин басма сөз борбору билдирди.

"Дагы 2 кишинин денеси кинологдордун иттери аркылуу табылып, урандынын астынан чыгаруу иштери жүргүзүлүп жатат", - деп билдирди Кыргызстандан барган куткаруучулардын башчысы, подполковник Ырысбек Жолдошбаев.

Издөө-куткаруу иштери түнү менен да уланып куткаруучулар эки объектиде иш алып бара тургандыгы айтылды.

Эске салсак, Түркияда Сирияда күчү 7,8 жана 7,5 баллга жеткен эки жер титирөө катталган.

Булак: NazarNews.kg