Украинанын каржы министри Сергей Марченко АКШ администрациясынан айына кеминде 2 миллиард долларлык чукул экономикалык жардам сурап жатканын билдирди. Анын айтымында, бул акчасыз Украинадагы гуманитардык кризис курчушу мүмкүн.

Марченко The Washington Post (WP) гезитине жалпысынан анын өлкөсүнө ай сайын кеминде 5 миллиард доллар эл аралык жардам керек экенин айтты. Бул суммада ал Украинанын апрель, май жана июнь айларындагы керектөөлөрүн эсептеп чыккан.

Мындан тышкары, украин бийликтери узак мөөнөттүү келечекте аскердик операциялардан келтирилген зыяндын ордун жабуу үчүн көбүрөөк акча талап кылышы мүмкүн.

"Керектүү каржылоону тартуу жана бул согушта жеңишке жетиш үчүн биз азыр бул боштукту толтурушубуз керек", - деп түшүндүрдү Марченко.

Ал акча каражаты, тагыраак айтканда, саламаттыкты сактоо жана билим берүү тармагынын кызматкерлерине пенсия жана айлык акы төлөөгө, ошондой эле гуманитардык муктаждыктарды жабууга керектигин тактады.

Жалпысынан АКШ февраль айынан бери Украинага экономикалык жардам катары 1 миллиард доллар бөлдү, деп жазат WP. Өткөн аптада АКШ бийликтери дагы 500 миллион доллар бөлүүгө макул болушкан.

Орусиянын 24-февралдан бери уланып жаткан “аскердик операциясынын” фонунда Украина жардамга муктаж. Кечээ, 25-апрелде мамлекеттик катчы Энтони Блинкен менен Пентагондун башчысы Ллойд Остин Киевге барышып, визиттин жыйынтыгында Украинага аскердик колдоону күчөтүүнү убада кылышкан.

Булак: NazarNews.kg