Министрлер Кабинетинин Төрагасынын орун басары Улан Маматканов Ысык-Көл облусуна болгон жумуш сапарынын алкагында “Run The Silk Road” эл аралык марафонунун ачылыш аземине катышып, облустагы бир катар социалдык объектилерди кыдырды.

Марафондун ачылыш аземинде сөз сүйлөгөн МинКаб Төрагасынын орун басары Улан Маматканов быйыл Евразиянын калкынын, экономикасынын жана ресурстарынын олуттуу бөлүгүн бириктирген Шанхай кызматташтык уюмуна Кыргыз Республикасы төрагалык кылып жатканын жана уюмдун 25 жылдыгы белгиленип жатканын билдирди. Ал аймак тарыхый Жибек Жолунун мураскери экенин, бул иш-чарага өзгөчө символика берээрин белгиледи.

"Кыргызстан – жыл бою спорт менен машыга турган өлкө. Бул марафондун өзгөчөлүгү - деңиз деңгээлинен 1633 метр бийиктикте өтүп жаткандыгы. Марафондун аралыгы Ысык-Көлдүн жээгин бойлой жүргүзүлөт, анда катышуучулар чыныгы уникалдуу жаратылышты сезе алышат. Ысык-Көл марафону эл аралык мелдештерде өзүнүн ордун бекем кармап турат. Бүгүнкү күндө технологиянын өнүккөн доорунда адамдардын активдүүлүгү аз. Андыктан массалык спортко мүмкүн болушунча көбүрөөк адамдарды тартуу зарыл", - деди Улан Маматканов.

МинКаб Төрагасынын орун басары Улан Маматканов жумуш сапарынын алкагында бир катар социалдык объектилер менен таанышты. Анда Балыкчы шаарындагы Ысык-Көл индустриалдык-педагогикалык колледжинде болду. Колледждин окуу процесси заманбап технологияларды, анын ичинде санариптик платформаларды, интерактивдүү окутуу ыкмаларын жана практикага багытталган мамилени колдонот.

Андан соң Улан Маматканов Ысык-Көл облустук бириккен ооруканасынын 100 орундуу Ак-Суу реабилитациялык бөлүмүнүн ишмердүүлүгү менен таанышты. Мында жылына 2400-2500 бейтапты, анын ичинде церебралдык шал оорусу менен жабыркаган 1700гө жакын балдарды дарылайт. Жаңы имараттарды куруу жана негизги имаратты капиталдык оңдоо 2026-жылы башталган.

Ошондой эле, Ак-Суудагы аялдардын психоневрологиялык социалдык мекемесине барып, бейтаптардын жашоо жана дарылоо шарттары менен таанышты. Текшерүүнүн жыйынтыгында бир катар тапшырмалар берилди.

Каракол шаарында Министрлер Кабинетинин төрагасынын орун басары Улан Маматканов К. Тыныстанов атындагы Ысык-Көл мамлекеттик университетинде болуп, андагы оңдоо иштери жана окуу-тарбия иштери менен таанышты. Университетте 6000ден ашуун студент бар, окуу процессин 17 бөлүм камсыздайт жана 250дөн ашык окутуу билим берет.

Жумуш сапардын жыйынтыгында тийиштүү мамлекеттик органдарга бир катар тапшырмалар берилди, анын ичинде саламаттыкты сактоо жана билим берүү объектилерин модернизациялоо боюнча долбоорлорду өз убагында ишке ашырууну камсыздоо, ошондой эле курулуш жана оңдоо иштеринин сапатына жана мөөнөтүнө көзөмөлдү күчөтүү. Өзгөчө көңүл медициналык кызматтардын жеткиликтүүлүгүн жогорулатууга, реабилитациялык инфраструктураны өнүктүрүүгө, заманбап билим берүү шарттарын түзүүгө бурулду.