Министрлер кабинетинин төрагасы Улукбек Марипов мамлекеттик жана муниципалдык кызматкерлерди кесиптик майрамы – Кыргыз Республикасыннын мамлекеттик жана муниципалдык кызматкерлеринин күнү менен куттуктады.

“Урматтуу мамлекеттик жана муниципалдык кызматкерлер! Сиздерди кесиптик майрамыңыздар – Кыргыз Республикасынын мамлекеттик жана муниципалык кызматынын кызматкерлеринин күнү менен куттуктайм!

Үстүбүздөгү жылы өлкөбүз өз көз карандысыздыгынын 30 жылдыгын белгилейт. Биз республикабыздын калыптануусуна, чыңдалуусуна жана гүлдөп-өсүшүнө салмактуу салымын кошкон белгилүү ишмерлер, мамлекеттик жана муниципалдык кызмат системасынын ардагерлери жана кызматчылары менен сыймыктанабыз.

Дүйнө өлкөлөрү учурда уланып жаткан коронавирус пандемиясынын татаал мезгилин баштарынан кечирүүдө. Мындай мезгилде ар бир мамлекет үчүн кесипкөй аракет, коюлган максаттарга жетишүүдө жана мамлекетти чыңдоодо мамлекеттик кызматкерлердин эриш аркак жана кайтарымдуу аракети өзгөчө маанилүү.

Мен сиздердин бардыгыңыздарды өлкөбүздүн экономикалык жана социалдык өнүгүүсү, жарандарыбыздын жашоо сапатын жана бакубаттуулук деңгээлин жогорулатуу үчүн ак ниет, ачык, жоопкерчилик, кесиптик билимиңиздерди толук кандуу пайдалануу менен иштөөгө чакырам.

Сиздерге чың ден соолук, бакыт-таалай, кесиптик ишмердигиңиздерде жаңы ийгиликтерди жана жетишкендиктерди каалайм!”

Булак: NazarNews.kg