Нарында уюшкан кылмыштуу топтун мүчөсү Алмаз Сулаймановду өлтүрүүгө шектүү Талгат Шамиевдин бөгөт коюу чарасы катары колдонулуп, 28-майга саат 14: 15ке чейин 2 айга камакка алынды. Мындай чечимди Бишкектин Биринчи Май райондук соту 30-мартта кабыл алганы белгилүү болду. Мекеменин маалыматына ылайык, кылмышка шектүү УКМКнын тергөө абагында камакта болуп турат. Бул тууралуу NazarNews.kgге 1-Май райондук сотунан кабарлашты.

Эске сала кетсек, буга чейин Нарын облусунда Лимонти каймана аты менен белгилүү болгон кримтөбөл Алмаз Сулаймановду бычактап кетишкен.

Аталган кылмыш иши боюнча Нарын ОИИБи: “2020-жылдын 28-март күнү саат 12:50 чамасында Нарын шаарында Тойота-Пассо үлгүсүндөгү автоунаасы менен Лексус 570 үлгүсүндөгү автоунаасы жол кырсыгына учураган. Анын натыйжасында эки айдоочунун ортосунда сөздөн сөз чыгып урушуп, анан бири-бирин бычак менен сайып салышкан. Андан соң Нарын ОИИБинин имаратына келип "киши өлтүрүп алдым окшойт. Мына алып келдим"-деп Нарын шаарынын тургуну 1995-жылы туулган Ш.М. кайрылган”,-деп билдиришкен.

Шектүү катары кармалган жаран-1998-жылы Лимонти (Алмаз Сулайманов) тарабынан өлтүрүлгөн делген уюшкан кылмыштуу топтун Имаш Шамиев аттуу мүчөсүнүн уулу.

Белгилей кетсек, Алмаз Сулайманов (Лимонти) 1998-жылы Имаш Шамиевди өлтүргөндүгү үчүн 25 жылга кесилген. 18 жыл олтургандан кийин августта Сулайманов Нарындагы жатак-абакка которулган. Алдын ала айтылган кабарларга караганда Лимонти Нарында уюшкан кылмыштуу топтун мүчөсү Имашты килемге ороп, өрттөп, Нарын дарыясына ыргытып жиберген. Уулу бой жетип, атасы үчүн өч алган болушу мүмкүн деген версиялар айтылууда.

Маркумдун денесинен 14төн ашык бычактын издери табылганы маалым болду.

Булак: NazarNews.kg