Депутат Адахан Мадумаров күч түзүмдөрүнүн өкүлдөрүн Жогорку Кеңештин жыйынына келип, активисттер менен саясатчылардын массалык түрдө кармалышы боюнча маалымат берүүнү талап кылган кесиптештерин колдоду.

Парламенттин 26-октябрдагы жыйынында ал 23 адамдын кармалышына Кыргызстандын сыртында миңдеген жарандар жооп кайтарганын белгиледи.

"Бүгүн эч нерсе болбогондой мыйзам долбоорлорун талкуулап отуруп алсак, анда эл өкүлү деген наамга татыксызбыз. 23 адам кармалды. Министрлер кабинети же президент суроолорду киргизип, аларды керектүү материалдарсыз жана шашылыш түрдө кароону талап кылышса, Жогорку Кеңеш муну кубануу менен кабыл алат. Бүгүн бул маселени кезексиз тартипте кароону суранам», - деди Мадумаров.

Депутат Фархат Исмаилов жооп катары Мадумаровдон өзүн пиарлабоону суранды.

"Адахан Кимсанбаевич кайсы жерде болбосун өзүн пиарлап жүрөт. Токтотуңуз, мындай болбойт. Жөнөкөй жерден пиар кылган туура эмес. Өлкөбүз кыйын акылбалда турганда кичине сабырдуу болуу керек. Дин жөнүндө сүйлөйсүз, бирок ал жөнүндө эч нерсе билбейсиз, бул жаман. Анткени, мамлекет башчынын дарегине айтылган сөздөр таш ыргытканга барабар. Бул таш сизге да тийип калышы мүмкүн. 30 жылдын ичинде мамлекет үчүн биздин президенттей чоң иштерди жасаган эмес. Сиз ушул 30 жылда бир да кирпич алып келген жоксуз. Аны укук коргоо органдары аныктайт. Уят болуунун кереги жок. Анан мага комментарий берүүнүн кереги жок. Керек болсо кеңсеңизге келип баарын түшүндүрөм», - деди ал.

Исмаиловду Жеңишбек Токторбаев колдоду. "Ал өзүнөн башка эч кимди сүйбөйт, өзүнөн башканы акылдуу деп эсептебейт. Бул жеңил пиар. Бул саясий таштанды, 30 жылдан бери публикага ойноп келе жатат", - деди депутат.

Бирок Дастан Бекешев депутаттар бири-бирине баа бере албастыгын эске салды. "Биз бири-бирибизди жана депутаттык мандатты сыйлашыбыз керек", - деди Бекешев.

Булак: NazarNews.kg