Бүгүн, 29-январда, Кыргызстан менен Тажикстандын УКМК башчылары Камчыбек Ташиев жана Саймумин Ятимов жолугуп, сүйлөшүүнүн жыйынтыгы боюнча маалымат беришти.

Алгач коңшу мамлекеттин УКМК төрагасы Ятимов сүйлөгөн. Анын айткандарын тезис түрүндө келтиребиз:

Өлгөндөр жана жабыркагандар бар. Бул мамлекеттик чек арадагы маселелер чечилбей жаткандыгынын жыйынтыгы;

Маселени укуктук актылардын негизинде чечүү керек. Алар биргелешкен макулдуктун натыйжасында кабыл алынганы туура;

Укуктук акт жана кол коюлган протоколдон четтеп кетүү чыр-чатакка себеп болууда;

Ташиев менен конструктивдүү пикир алышуу болду. Анда сүйлөшүү учурунда негизги документтерди жана биздин комиссиялардын жумушунун жыйынтыгын эске алууну макулдаштык.

Ятимов протоколдогу талаптар аткарылышы керек деген оюн билдирген. Анын ичинде кеп №39 протокол тууралуу болуп жатат. Сегиз күндөн кийин тараптар бул протоколду ишке ашырууга өтүшөт. Ошондой эле аталган документте жазылган төмөнкү пунктулар боюнча иш алып барышмакчы;

Сегиз күндөн кийин эки тараптан түзүлгөн комиссия топографиялык жана укуктук маселелер боюнча иштей баштайт. Бул жумуштар чек араны делимитация жана демаркациялоодогу бардык маселелерди чечүү үчүн тынымсыз жүргүзүлөт;

Жакын арада комиссиянын (кайсыл экени так айтылган жок) ишин талкуулай турчу жолугушуу болот;

Бардык маселени укуктук талаада, эки элдин тең кызыкчылыгын көздөп чечүү керек.

Ятимовдон соң Ташиев сүйлөшүүнүн жыйынтыгы боюнча пикирин билдирген.

"Бүгүн тажик тарап менен делимитация жана демаркация боюнча өкмөттөр аралык комиссиянын ишин жандантуу тууралуу сүйлөштүк. Комиссиянын иши эки ай мурда токтоп калган. Эми аны дайыма, тынымсыз иштетүү чечимин кабыл алдык. Анда эки мамлекеттин протокол, кызыкчылыктары эске алынат. Эч кандай документке кол койбосок дагы сөзүбүз, кол алышуубуз аткарылат деп ойлойм", — деди Ташиев.

Булак: NazarNews.kg