Япониянын бийлиги ”Мавар” тайфунун жакындаганына байланыштуу 138,7 миң адам эвакуацияланганын жарыялады. Бул тууралуу Reuters агенттиги билдирди.

Жакындап келе жаткан тайфундан улам Япониянын айрым жерлеринде катуу жамгыр жаап баштады, ал эми өлкөнүн көпчүлүк бөлүгүндө катуу шамал жана жамгыр жаашы мүмкүн.

Ушул аптанын башында Гуамды каптаган Мавар мурдагы супер тайфун статусунан тропикалык бороондун деңгээлине чейин алсыраган. Тайфун Тынч океанга жылып кеткендиктен, бороон-чапкындын басымдуу бөлүгү Хонсю аралынын түштүгүнөн өтөт деп күтүлүүдө.

Анткен менен синоптиктер тайфундан келген нымдуу аба мезгилдүү жаан-чачындын фронтуна кирип, катуу локалдуу нөшөрлөгөн жамгырга алып келиши мүмкүн экенин эскертишти.

Ушундай эле аба ырайы шарттары мурда да суу ташкындарына жана жер көчкүлөргө себеп болгон, өзгөчө 2018-жылы жайында, Япониянын батышында 200дөн ашуун адам каза болгон.

Жайкы нөшөрлөгөн жамгыр Японияда сейрек эмес, бирок июндун башында мындай бороон үчүн адаттан эрте болуп жатат. 1-июнда Япониянын метеорологиялык агенттиги (JMA) өлкөдө 1898-жылдан берки эң жылуу жаз болгонун билдирди.

JMA Окинава аралдарынын чынжырчасын жана Сикоку менен Хонсюнун айрым бөлүктөрүн суу каптоо боюнча эскертүү берип, 3-июнь, ишемби күнү эртең менен 24 сааттын ичинде батыш Хонсунун айрым жерлеринде 350 миллиметр жамгыр жаашы мүмкүн деп болжолдоду.

Булак: NazarNews.kg