Караколдо жалгыз бой эне өмүрүн кыюуга аракет кылган. Бул тууралуу жергиликтүү басылмалардын бири Каракол шаарынын вице-мэри Гүлназ Орозовага таянып жазып чыкты.

Анын айтымында, ал аял 2 баланы багып, алардын биринин майыптыгы бар.

“Кечээ маалымат келгенден кийин мэриянын жана “Тирек” реабилитациялык борбордун кызматкерлери ал үй-бүлөгө барышкан. Ал аял көп дары ичип алып, өмүрүн кыюуга аракет кылган. Бирок аны медицина кызматкерлери куткарып калган. Ал үй-бүлөсүн бага албай жатканын айтты. Кечээ күнү мэриянын кызматкерлери гуманитардык жардам алып барып берди. Ошондой эле, балдарга жардам борбору да азык-түлүк түрүндө жардам беришкен. Учурда ал аял менен психологдор иштеп жатат”, – деди ал.

Малыматта айтылгандай, учурдагы кырдаалга байланыштуу ал аял күнүмдүк оокатын таап иштеген ишинен ажыраган.

Бул тууралуу NazarNews маалымат агенттиги Ысык-Көл ОИИБине байланышканда, мындай факт катталбаганын билдиришти.

Булак: NazarNews.kg