“Ысык-Көл” биосфералык аймагына полиэтилен пакеттерди жана пластик ийдиштерди ташып киргизүүгө, өндүрүүгө, сатууга жана пайдаланууга тыюу салуу жөнүндө” Мыйзам долбоору 1-мартта Жогорку Кеңеште талкууланат.

Ысык-Көлдүн акваториясынын жаратылышын жана экологиясын коргоо боюнча иштин солгун жүрүп жаткандыгына  карата экологдор, активисттер, жарандык секторлор тарабынан келип түшкөн кайрылуулардын саны өсүп бара жатат. Мындан  улам Коомдук кеңеш тарабынан Ысык-Көл биосфералык аймагынын көйгөйлөрүнө жана келечегине көңүл бурууга, жаратылышты коргоо боюнча мыйзамдардын аткарылышын изилдөөгө, полиэтилен пакеттеринин жана пластик идиштеринин айлана-чөйрөгө тийгизген жагымсыз таасирин кыскартууга багытталган мыйзам долбоорлорун талкуулоо чечими кабыл алынды.

Андан тышкары, таңгактоочу материалдардын жаңы өндүрүшүн стимулдаштыруу жана пластик продукцияларынын ордун толтуруу, жаратылышка зыян келтирбеген тез жок болуучу материалдардын өндүрүштүн альтернативдик технологиясын өнүктүрүү жана импорттоо үчүн өзгөчө жеңилдиктердин маселелерин талкуулоо күтүлүүдө. Тагыраак айтканда:

• Ысык-Көлгө жылына 1.5 миллионго чейин туристтер келет, бул болсо көлдүн экосистемасына түздөн-түз таасир тийгизет;
• Пластик нефтини кайра иштетүүнүн продукциясы болуп саналат жана ал чиригенде коркунучтуу заттарды бөлүп чыгарат. Чирүү процесси 50 жылдан 500 жылга чейинки убакытты алышы мүмкүн. Алынып келинген жана колдонулган полиэтилен баштыктардын жана бөтөлкөлөрдүн көпчүлүк бөлүгү көлдүн жээгинде топтолуп, түбүнө чөгүп калат;
• Ысык-Көл областынын аймактарында 83 таштанды жайлары жайгашкан, алардын ичинен 24ү санкциаланган жана 58 санкцияланган эмес. Таштанды жайларынын жалпы аянты 49 гектар аянтын түзөт;
• Бүгүнкү күндө катуу турмуш-тиричилик калдыктарын жайгаштыруу полигондорун эксплуатациялоонун мөөнөттөрү эчак өтүп кеткен. Чоң шаарлардын таштанды жайларынын көпчүлүгүнүн эксплуатациялык мүмкүнчүлүктөрү 15-20 жылга эсептелинген, бирок бул 30 жылдан ашуун мөөнөткө создуктурулган;
• Ысык-Көл областынын аймагында (дегеле республика боюнча алганда) катуу турмуш-тиричилик калдыктарын кайра иштетүүчү завод жок;
• Инвентаризациянын жыйынтыгы боюнча катуу турмуш-тиричилик калдыктарынын жылдык көлөмү 94 миң кубду түзүп, мунун ичинен пластиктин үлүшү 30 дан 50 пайызга чейинки көлөмгө жетиши мүмкүн;
• Ар жыл сайын волонтерлор өз күчтөрү менен көл түбүнөн жана жээктерден тонналаган пластиктерди жыйнашат;
• Ысык - Көлдүн фаунасы үчүн эң чоң коркунучту микропластиктер жаратат;
• Азыркы учурда көлдө жашаган эндемикалык балыктардын жана жерде-сууда жашоочулардын бир канча түрлөрүнүн жок болуп кетүү коркунучу бар.

Булак: NazarNews.kg