Өзбекстан Республикасынын биринчи президенти Ислам Каримовдун каза тапканына 7 жыл болду. Буга байланыштуу анын кичүү кызы Лола Каримова – Тилляева атасын жана аны менен болгон эскерүүлөрүн жазып, Каримовдун жашоосундагы орду дагы эле белгилүү экенин, атасын сагынганын жазган.

«Акыркы жылдары атамдын көз жумган күнү жакындаган сайын мени эскерүүлөрдүн, кыялдардын, ойлордун толкуну каптады. Бул монологдо балалык сагынуу сезими, өткөн маектерибизди эскерүү сезими айтылат.

Кичинекей кезимде атам мени «кичинекей философ» дечү, ал кезде бул сөздүн маанисин түшүнбөсөм да, абдан кызыктуу, маанилүү нерсе экенин сезчүмүн. Мен чоңойгон сайын бул сөздөр менин көп жылдар бою пайда болгон кызыгууларымды эң сонун сүрөттөп турганын түшүндүм. Атам ар дайым нерселердин, адамдардын, окуялардын маңызын түпкүрүнөн түшүнө алган.

Мага аны менен сүйлөшүү абдан жакчы, өзгөчө акыркы жылдары. Бала кезинде турмуштун улуу жолун басып өткөн атамдын айтып берген сөзүн, экөөбүздүн маектерди сагындым. Эгерде мен азыр анын суроолорума берген жоопторун уксам, бул мен үчүн чоң жардам жана баа жеткис бата болмок. Биздин сейрек, бирок өтө маңыздуу маектерибиз мени критикалык ой жүгүртүүнүн маанилүүлүгүн түшүнүүгө, жеке сезимдерди чындыктан айырмалоого үйрөттү. Ар кандай татаал кырдаалда сырттан көрүү канчалык маанилүү экенин түшүнүүгө жардам бергени үчүн атама ыраазымын. Бул сапат адамга өзүнүн эмоциясын башкара алганга жардам берет, бейпилдик жана ишеним сезимин берет.

Анын бир кезде түшүнүксүз болуп көрүнгөн көп сөздөрү азыр мага өзгөчө көрүнүп турат. Дээрлик күнүгө “Туура айтты окшойт” деген ой мээмден өтөт.

Атам экөөбүз азыр эки башка дүйнөдөбүз жана бири-бирибиз менен байланышы жок эки абоненттей сүйлөшө албайбыз. Ошого карабастан, мен анын жоопторун кээде элестүү маектеримде угуп калганымды сезем», - деп жазган Лола Каримова.

Белгилүү болгондой, Каримовдордун үй-бүлөсүнүн улуу кызы Гүлнара Каримова бир катар кылмыштарга айыпталып, 2013-жылдан бери абакта отурат. Үй-бүлөнүн кичүүсү Лола Каримова -Тилляева атасы каза болгондон кийин жолдошу Тимур Тилляев жана балдары менен АКШга көчүп кеткен. Ислам Каримов атындагы республикалык кайрымдуулук коомдук фондун аралыктан башкарат. Лола Каримова АКШда "The Harmonist" кийим брендин негиздеген.

Ислам Каримовдун жесири Татьяна Каримова Ташкентте жашайт. Ал Ислам Каримовдун элесин түбөлүккө калтырууга катышып, Каримов атындагы республикалык коомдук фонддун ишмердүүлүгүн жетектейт.

Севара Хусниддинова, Ташкент

Булак: NazarNews.kg