Украинанын президенти Владимир Зеленский эгер бул себептер Украина үчүн тынчтык алып келсе же өлкөнүн НАТОго мүчө болушу менен алмаштырылса, мамлекет башчылык кызматын таштоого даяр экенин билдирди. Анын бул билдирүүсүн 23-февралда «Украинская правда» жана УНН маалымат агенттиктери жарыялады.

«Эгерде бул себептер Украина үчүн тынчтык алып келсе, эгерде силер үчүн менин кызматтан кетишим маанилүү болсо, мен даярмын. Эгерде мындай шарттар бар болсо, кызматымды НАТОго мүчөлүккө да алмаштырсам болот», – деди Зеленский.

Анын айтымында, ал жыйырма жылдан кийинки эмес  азыркы учурдагы Украинанын коопсуздугуна басым жасап жатат. Ошондой эле ал бийликте ондогон жылдар бою калууну көздөбөй турганын баса белгиледи.

Зеленский Трампты Украина үчүн өнөктөш катары көргүсү келет

Зеленский Киевдеги басма сөз жыйынында АКШнын президенти Дональд Трампты Украина үчүн жөн гана ортомчу эмес, толук кандуу өнөктөш катары көргүсү келерин билдирди.

«Мен чындап эле мунун жөн гана ортомчулук эмес, андан да чоң нерсе болушун каалайм», – деп анын сөзүн Reuters агенттиги келтирди.

Ал ортомчулук жетишсиз экенин жана Трамп Украина үчүн активдүү өнөктөш болушу керектигин белгиледи.

Трамп Путин менен Зеленскийди жолугушууга чакырды

Буга чейин, 21-февралда, АКШнын президенти Дональд Трамп Орусиянын лидери Владимир Путин менен Украинанын президенти Владимир Зеленскийдин жолугушуусу керектигин айтып, бул эки өлкөнүн ортосундагы согушту токтотууга жардам берет деген ишенимин билдирди.

«Менимче, президент Путин менен президент Зеленский жолугушушу керек. Эмне үчүн? Анткени биз миллиондогон адамдардын өлүмүн токтоткубуз келет», – деди ал журналисттерге.

Ошол эле күнү Трамп Fox News Radio’га берген маегинде, Орусиянын Украинага каршы согушун токтотуу боюнча сүйлөшүүлөргө Зеленскийдин катышуусу зарыл деп эсептебей турганын айтты. Учурда ал эки тарап менен тең диалогду улантып жатканын баса белгиледи.