Урматтуу Өткүрбек Асилбекович! Тазалоону Прокуратуранын өзүнөн баштайм деген сөзүңүздөн кийин көпчүлүк эл жакшы үмүт менен сиздин кийинки кадамдарыңызга аңдоо салып турабыз.

Сизден өтүнүч. КР Башкы Прокурору катары алгачкы кадамдарыңызды калыстык орнотуудан баштасаңыз. Коррупция менен аралашкан, паракор кызматкерлер менен биргеликте эле саясий заказдарды аткарып, бийлик оппоненттерине жок жерден жалаа жаап, кылмыш ишин ачкан кызматкерлерди да эсиңизге алсаңыз.

Мисалы алардын бири: Жохонгир Ботобаев.

Жохонгир Ботобаев Ө. Текебаев менен Д. Чотоновдун үстүнөн болгон сот отурумуна айыптоочу катары катышып, өзүн айрыкча текебер, агрессивдүү кармап, жада калса соттук процессте судья Айбек Эрнис уулу чечим чыгаруу үчүн кеңешме бөлмөгө чыгып жөнөгөндө ага телефонун көрсөтүп, аны менен кошо сыртка чыгып, кызматтык абалынан кыянаттык менен пайдаланып, мыйзамдарды одоно бузган учурларын өз көзүбүз менен көрдүк. Бул сөзубүзгө ошол жерде катышкан Ө. Текебаевдин тарапташтары, жактоочулары жана ММК өкүлдөрү күбө. Жохонгир мырза ошол кылган кызматтары үчүн эскертүү же сөгүш алуунун оордуна тескерисинче кийин жетекчилик тарабынан көтөрмөлөнүп, сыйга арзыды.

Кана калыстык? Адамдын, жарандын укугу деген түшүнүктөр тепсендиде калды беле? Же прокуратура кызматкерлери үчүн башка мыйзам барбы?

Бул өтүнүчтү сиз көңүл сыртында калтырбайт деген үмүт менен жазып олтурам.

Урматоом жана сизге ийгилик каалоо менен;

Чыңгыз Айтматов атындагы жаштар сыйлыгынын лауреаты, КР Президентинин Ардак грамотасынын ээси, журналист  Шайырбек Абдырахман уулу

Булак: NazarNews.kg