Aloula уюму Saudi Music Hub менен өнөктөштүктө ишке ашырган хордук ырдоону өнүктүрүү боюнча жаңы демилге 9 жаштан 18 жашка чейинки өспүрүмдөрдү вокалдык билим берүүнүн системалуу программасына тартты. Программанын жыйынтыгында катышуучулар Сауд Аравиясынын улуттук гимнин аткарышат.

Ноябрь айында башталган эки айлык бул демилге — Сауд Аравиясында коммерциялык эмес уюм тарабынан ишке ашырылып жаткан балдар хорунун алгачкы программаларынын бири болуп саналат.

Репетиция залында 75 бала Сауд Аравиясынын улуттук гимни «Аш аль-Малик» жана «Ватани аль-Хабиб» ырын толук хордук аткарууда үйрөнүшүүдө.

Катышуучулардын арасында 14 жаштагы Наваф Аль-Кахтани да бар. Ал бул тажрыйба аны аткаруучу катары өстүргөнүн белгиледи.

Балдар дүйшөмбүдөн шаршембиге чейин жумасына үч жолу вокал сабактарына катышып, үн техникасына, угуу көндүмдөрүнө жана ансамблдик аткарууга өзгөчө көңүл бурушат.

ArabNews басылмасына берген маегинде Aloula уюмунун башкы директору Абир Абусулайман бул долбоор балдарды Падышалыктын маданий өзгөрүүлөрүнө түздөн-түз катыштыруу максатында иштелип чыкканын айтты.

Анын айтымында:
«Азыр Сауд Аравиясы өзгөчө маданий мезгилди баштан кечирүүдө. Биз балдарыбыз бул процессти сырттан гана көрүп турбастан, анын бир бөлүгү болушун кааладык. Бул аларды жакындатуунун, өзүнө болгон ишенимин арттыруунун жана эстен кеткис, кубанычтуу учурларды тартуулоонун эң мыкты жолу деп ойлодум», — деди ал.

1962-жылы негизделген Aloula уюму балдар жана үй-бүлөлөр менен эрте өнүгүүгө багытталган программалар аркылуу иш алып барып, академиялык, чыгармачылык жана социалдык көндүмдөрдү чыңдоого көңүл бурат. Бул демилге уюмдун балдардын өзүнө болгон ишенимин арттыруу жана чыгармачылыкка тартуу багытындагы кеңири стратегиясын чагылдырат.

Абу Сулаймандын айтымында, музыка жөн гана сахнадагы аткаруудан да терең сабактарды берет:

«Музыка баланын ичиндеги өзгөчө нерсени ачат. Ал угууга, өзүн эркин билдирүүгө, команда менен иштөөгө жана өз үнүнө ишенүүгө үйрөтөт. Бул чыгармачылык тажрыйба балдарга өздөрүн эркин сезүүгө жардам берет жана мектепти бүткөндөн кийин да пайдалуу», - дейт.

Анын белгилешинче, долбоордун пайдасы жыйынтыктагы концерт менен гана чектелбейт:

«Академиялык жактан музыка көңүл топтоону жана эс тутумду жакшыртат. Социалдык жактан — биргелешип иштөөгө жана бири-бирин колдоого үйрөтөт. Ал эми жеке деңгээлде — балдар өзүнө ишенип, сыймыктанган учурду тартуулайт. Көпчүлүк балдар мурда сахнага чыгып көргөн эмес. Бул тажрыйба аларды чоң кыялдарга жетелеши мүмкүн».

Saudi Music Hub борборунун вокал боюнча окутуучусу Абир Ибрагим да бул программада активдүү иш алып барууда. Ал Египет консерваториясынын бүтүрүүчүсү болуп, жаш ырчыларга вокал жана музыка теориясын үйрөтүүгө адистешкен.

«Балдар менен иштөө мага өзгөчө сезимдерди тартуулады. Башынан эле алардын шыктануу менен иштеп жатканын көрдүм. Жаш курагына карабастан, алардын арасында абдан мыкты үндөр бар экенин байкадым», — деди Ибрагим.

Ал ошондой эле улуттук гимнди аткаруунун маанисине токтолуп: «Сауд Аравиясынын гимнин ырдоо балдарда өлкөсүнө жана маданиятына болгон сезимин күчөтөт», — деп белгиледи.

Бул демилге Aloula уюмунун билим берүү жана чыгармачылык программаларынын кеңири портфелинин бир бөлүгү болуп саналат. Анын катарына робототехника программалары, ошондой эле Жиддадагы маданий жана спорттук иш-чаралар менен тааныштыруучу коомдук долбоорлор кирет.

Saudi Music Hub — Маданият министрлигинин алдындагы Музыка комиссиясына караштуу билим берүү мекемеси болуп, 2022-жылы түзүлгөн. Башкы кеңсеси Эр-Риядда жайгашып, Жидда жана Эль-Хобар шаарларында филиалдары бар. Борбор музыкалык аспаптарды үйрөтүү, хор даярдоо жана аткаруучулук мастер-класстарды өткөрүү менен жергиликтүү таланттарды өнүктүрүүгө басым жасайт.

Абусулаймандын пикиринде, бул өнөктөштүк маданий жана социалдык уюмдардын кызматташуусунун маанисин айгинелейт:

«Күчтөрүбүздү бириктирүү менен биз балдарыбыз үчүн башкача мүмкүн болбогон шарттарды түзө алабыз. Мындай кызматташтык коммерциялык эмес сектор үчүн жаңы мүмкүнчүлүктөрдү ачат деп ишенем», дейт arabnewsка берген маегинде.