Журналист Сандугаш Дүйсеновага козголгон кылмыш иши жабылганын Жетисуу облустук прокуратурасынын басма сөз кызматы билдиргенин Каз ТАГ жазды.

«Маалым болгондой, журналист Сандугаш Дүйсеновага жеке турмуштун кол тийбестигин жана жеке маалыматтар жана аларды коргоо боюнча мыйзамдарды бузуу фактысы (ККнын 147-беренесинин 5-бөлүгү) боюнча кылмыш иши козголгон», - деп айтылат прокуратуранын шейшемби күнкү билдирүүсүндө.

Ведомстводон түшүндүрүшкөндөй, Кылмыш-жаза кодексинин 147-беренесинин 5-бөлүгүнө ылайык, жеке маалыматтарды массалык маалымат каражаттарында мыйзамсыз таратуунун натыйжасында адамдын укуктарына жана мыйзамдуу кызыкчылыктарына олуттуу зыян келтирилген учурда кылмыш-жаза жоопкерчилиги пайда болот.

«Тергөө органы тарабынан мыйзамда белгиленген тергөө мөөнөтүндө жабырлануучуга олуттуу зыян келтирилгендигин тастыктаган жетиштүү фактылык маалыматтар алынган эмес. Ошого байланыштуу Талдыкорган шаарынын прокурорунун чечими менен аталган аракетте кылмыштын курамы жок болгондуктан (КЖКнын 35-беренесинин 1-бөлүгүнүн 2-пункту) сотко чейинки тергөө токтотулган. Ошол эле учурда, Администрациялык укук бузуулар жөнүндө кодексте жеке маалыматтарды мыйзамсыз чогултуу жана (же) иштеп чыгуу, эгерде бул аракеттерде кылмыш-жаза жоопкерчилигине тартуучу жосундун белгилери болбосо, жоопкерчилик каралган. Ошондуктан, материалдар административдик укук бузуулар жөнүндө мыйзамдарга ылайык кароо үчүн маалыматтык коопсуздук чөйрөсүндөгү ыйгарым укуктуу органга жөнөтүлдү», - деп кошумчалады көзөмөл органы.

Эске салсак, журналист Сандугаш Дүйсенова 11-август күнү гезиттеги макаласында адамдын жеке жашоосу тууралуу анын макулдугусуз маалыматтарды таратканы үчүн кармалган (Казакстан Республикасынын Кылмыш-жаза кодексинин 147-беренеси).

Андан соң журналисттин жактоочусу Илмира Назированын айтымында, колунда 2 жашар баласы бар учурда айылдашын өлтүргөн деп соттолгон гезиттин каарманы Сандугаш Дүйсенова каршы арыз жазган. 

Булак: NazarNews.kg