Жүз жылдан кийин Кыргызстанда мөңгүлөр калбайбы? Анысын так билбейбиз, билгенибиз Министрлер кабинетинин төрагасы Акылбек Жапаров Кыргызстанда жүз жылдыктын соңунда мөңгүлөрдүн 80%ы эрип жок болушу мүмкүн экенин айтты. Мындай пикирин ал Дубайда өтүп жаткан Бүткүл дүйнөлүк өкмөттүк саммитте билдирди.

Анын айтымында, Кыргызстанда 50 жылдын ичинде мөңгүлөрдүн 20-30 %ы ээрип кеткен. Ошол себептен кайра калыбына келүүчү энергия булактарына өтүү, электротранспортту өнүктүрүү, жерлерди органикалык түрдө иштетүүгө өтүү мезгилдин талабы болуп турат.

«Мөңгүлөрдү сактоонун бирден бир фактору болуп токой аянттарын көбөйтүү болуп эсептелет. БУУнун бул боюнча атайын резолюциясы да бар. Ага ылайык, «Жашыл мурас» улуттук кампаниясы башталып, 8 млн.дон ашык түп бак дарактар отургузулду. Бул сан жылдан жылга көбөйө берет», - деди Акылбек Жапаров.

Булак: NazarNews.kg