Парламенттин экс-спикери Ахматбек Келдибеков мурдагы башкы прокурор Аида Салянованын эжеси Чынара Турдалиеваны сотко берди.

Алдын ала айтылган маалыматтарга караганда, буга Чынара Турдалиеванын Ахматбек Келдибеков тууралуу жазган билдирүүсү себеп болгон. Бул тууралуу жоопкер Чынара Турдалиева ЖМКларга: “Ахматбек Келдибеков Өмүрбек Текебаев жөнүндөгү пикирин айткан. Мен ага жооп берип, жарандык позициямды гана билдирдим”,-деп айткан. Анын айтымында, бул Келдибековду акаарат кылуу эмес, жөн гана фактыларды констатациялоо (болгонун болгондой айтуу).

“Мен албетте, Келдибеков мени сотко бергенине таң калып жатам. Мен саясатчы же белгилүү адам эмесмин, мен катардагы мамлекеттик компаниянын кызматкеримин. Эгер Келдибеков соттошкусу келсе, демек, мага баарына белгилүү болгон фактыларды далилдөөгө туура келет”,-деп белгилеген ал.

Азырынча доогер тарап менен анын адвокаттары бул маселе жөнүндө пикир билдирише элек.

Арыз Бишкектин Октябрь райондук сотуна берилген. Ахматбек Келдибеков 5 миллион сом талап кылып жаткандыгы маалым болду.

Булак: NazarNews.kg