Согуш алааматын сездирип турган биздин кыргыздын Чинганчугу Атамбаевдин жүзү. Бул Кыргызстан үчүн эң жаман кабар. 6-апрелде өткөн  СДПКнын курултайынан соң партиялаш шакирттери брифингде атаманын көнүмүш аң-сезимден адаштырып, соолуктура алышкан жок, ал 7-апрелдеги митинг-реквиемде даңаза үчүн дардаңдаган сыңары, дагы дардаңдап алды. Бул курултайда бары болгон. Анын өзүн-өзү даңазалаган, көнүмүш дардаңпооз мактанчаактыгы жана адаттагыдай кимдир бирөөлөрдү маскаралоо, ачык эле күч түзүлүштөрүнүн кызматкерлерин жана алардын командирлерин бийликке баш ийбөөгө чакырыктар жана жаңы тополоң чыгаруу үчүн ачык эле үгүттөө.

Мындай атамбаевдин стилиндеги  «кошокту» өлкө көптөн бери укпай калган. Эми болсо Атамбаев өзүнөн-өзү өтүп кетти. Жаңы пайда болгон «Кошой атанын» менменсинүүсү, чыр уюштурууга болгон далалаты чектен чыгып, Бакиевге каршы уюштурган кампанияларга салыштырганда, андан да ашып кетти. Алмазбек Атамбаевдин тантыгандары,  Эдил Байсаловдун эсебинде, зордук-зомбулук менен бийликти алмаштырууга  жана аймак аралык жаңжалдарды күчөтүүгө чакырганы үчүн компетенттүү органдар тарабынан каралууга тийиш. Бул менен макул болбой коюуга болбойт. Андан тышкары оратордун акыл –эси жайында экенин аныктоо үчүн психиатриялык экспертизадан өткөзбөсө болбой калды. Акыл-эси жайында, ойлору тунук, соо адамдар мындай алабарман, чалакайым сөздөрдү айтпайт.

Ушундан улам селт этип, чоочуп кетсе болот. Атамбаев бийлик тарапка тор жайып, өлөр-өлгүчө күрөшкүсү келет.

Экс-президенттин ким менен күрөшүүгө даярданып жатканы, бул маанилүү болуп турганы менен, эң башкы сөз анын күрөшкүсү келип турганы.

Атамбаевден эл маанилүү, андан да эл-журттун жашоо - тиричилигин көтөрө турган сөздөрдү күтпөй калды. Ошондуктанбы, биздин «Кошой атабыз» факт жүзүндө согуш жарыялады –бул бийлик үчүн жаман сигнал. Албетте, Алмазбек Шаршенович зор күчтөргө эгедер эмес, бийлик менен теңата болууга күчү жок. Азырынча теңеше албайт. Бирок, элдин башын айлантып, тунук сууну чампалап, ылай сууга айлантууга таланты жетиштүү. Бул жагынан ага баа берип койсо болот, ал башаламандыкты уюштуруу жаатында алдына киши салбайт. Азыркыдай күчү жок бийлик турганда, же мындайча айтканда өз күчүн ачык көрсөтүүгө даай албай турган бийлик турганда, Атамбаевдин чыр-чатактарды, тополоңду уюштуруудагы тажырыйбасы тез эле өз жемиштерин берип коюшу да мүмкүн.

Алмазбек Атамбаевдин жүзү эки мерчемде көрүнүп турат. Бийликте жана оппозицияда. Чындыгы оппозицияда конструктивдүү, салмактуу, бир калыпта эмес, жалган сөздөр менен элди митингге чогултуп, чаң - тополоң кылып жиберүүгө даяр. Ошондуктан бирөөлөрдү кемсинткен, жүрөктүн үшүн алган калп аралашкан, чагымчыл,  ээликкен сөздөрдү аралаштырып жиберет. Анын сөздөрүн журналисттер пайдаланышып, ар кандай цитаталарга чачыратышып элди аралатып жиберет, калктын кээ бир жамандык издеп жүргөн катмарларына Атамбаев айткан ээн ооз, чириген сөздөр майдай жагат.

Бул так ошол Атамбаевдин бере ала тургандары. Албетте, көз карандысыз  «төртүнчү бийликтин» өкүлдөрүнүн көпчүлүгү Атамбаевдин сөздөрүнүн баасын билишет, ошондуктан көбүнчө куйкум айтылган сөз катары колдонушат, анткени, анын сөздөрү күлкүлүү, анткени, анын сөздөрү чыр-чатактуу. Андан тышкары Атамбаевдин «Апрель» телеканалы сыяктуу таянган, ишенимдүү «медиа-жүгүрүгү» бар, булар саясий кландын кызыкчылыгы үчүн акча алган соң, ар тараптуу колдоп турушат. «Апрелчилер» ачык эле ММКдан үгүттөө инструментине айланышкан. Алар эч кандай формалдуу эрежелерди тутушпайт. Алар кожоюнун акчасы үчүн төштөрүн амбразурага тосуп коюшкан. Азыркы кырдаал аларды бүгүлтүп, көчүктөрүн кожоюнуна тостуруп берип койгон. Сойкулук жана махабат тууралуу бир анекдот бар эмеспи, ошого окшошуп. Сойкуканада эркек аялга айтат эмеспи, секс үчүн акча төлөбөш үчүн, сени сүйөөрүмдү моюнума алам деп. Негизи сүйгөнү үчүнбү, акча үчүнбү же идеялык кызыкчылыктар үчүнбү, маанилүү деле эмес, башкысы Атамбаевдин телеберүүдө бригадасы бар экени чындык.

Биздин саясий элитанын туруксуздугу, «учурунда сатып кетпесе болбойт» деген принципке такала турганы да айныксыз.

Ал эми бийлик болсо өзүнүн кызыкчылыгын мамлекеттин кызыкчылыгынан жогору коюп, таарынычы үчүн душмандарынан кек алууга барына дапдаяр турган, башаламандык, тополоңдордун «кудайы» Атамбаевден келе турган коркунучтарды сезбей турат.

Атамбаевдин коркунучтарынан кутулуу үчүн Атамбаевге каршы турган күчтөрдү күчтөндүрүш керек. Буга чейин бийликтин  «мээ борбору» болуп эсептелинип, эми өз салмагын жоготуп «тирүү өлүккө» айланган  президенттик администрацияны чыңаш зарылдыгы турат. Бул иштерге Атамбаевдин заманында анын кызыкчылыгын ишке ашырыш үчүн күчүгүндөй шыйпалаңдаган Башкы прокуратураны, УКМКны жана башка күч түзүмдөрүн тартыш керек. Азыр башка убак жарым эс, оорулуу Атамбаевдин ыкмаларына каршы чара көрбөсө болбойт. Эгер бийлик анын кыйкырыгы  алсыздыгынан улам деп, жаңы келе жаткан башаламандыктын алдын албай «боржоми» ичип чалкалап жатса, кийин кеч болуп калат... Ленинграддын үч революцияны башынан өткөзгөн даңазасы тууралуу сөздөр аралап жүрөт. Атамбаев эки революцияны өзүм жасагам деп мактанганын токтотпойт. Эми үчүнчү революцияны да жасайм деген дымак бар, ошондуктан ушуга катуу даярданып жатат. Мындай башалмандык кылууну токтото турган убак келди. Калайык-калкка Атамбаевдин ким экенин түшүндүрүш керек. Ошондо гана Кыргызстанда «аралап жүргөн» Атамбаевдин «карааны» самындын көбүгүндөй жарылат.

Которгон: Азизбек КЕЛДИБЕКОВ, NazarNews.kg