Ата-энесинин камкордугусуз калган алты бала Орусиядан Кыргызстанга кайтарылды. Бул тууралуу Тышкы иштер министрлигинен билдиришти.

Маалыматка ылайык, Кыргызстандын элчилиги буга чейин Орусиянын компетенттүү органдары менен балдарды мекенине кайтаруу боюнча макулдашып, ошондой эле алардын мекенине кайтып келүү процессине керектүү тиешелүү документтерди даярдоого көмөктөшкөн.

«Элчилик Орусия Федерациясындагы Кыргызстандын жашы жете элек жарандарынын укуктарын жана мыйзамдуу кызыкчылыктарын коргоо боюнча ишин улантат», - деп билдирди Тышкы иштер министрлиги.