Айбандар үчкө бөлүнөт чөп жегендер, эт жегендер жана акча жегендер болуп. Акча жегендер президенттик администрацияга толуп алышып, Зилалиев сыяктуу миллион долларды тепкилешип футбол ойноп чалчактап жүрүштү. Президенттин инаугурациясында экс-президент Атамбаев ага иш бөлмөсүн тапшырууга аттанганда мурдагы вице-премьер-министр Дүйшөнбек Зилалиев бомба бар деп ай-ааламга жар салган. Арийне, мындай коркутууга карабай Жээнбеков иш бөлмөсүнө барып өзүнүн бийлигин өткөзүп алган. Сооронбай Жээнбеков президент болгон соң Зилалиев кармалып «Оптима банктын» банк ячейкасынан миллион доллар табылганы тууралуу видео тарап, элдин аң-сезиминде сакталып калган. Улуттук коопсуздук боюнча мамлекет комитет тергөө жүргүзүп жатканда эле Зилалиев «миллион доллар меники эмес, ошол кездеги президенттикке талапкер Сооронбай Жээнбековдун шайлоо өнөктүгүнүн акчасы болчу» деп айткан. Бирок Жээнбеков президент болуп тургандыктан аны эч ким суракка алган эмес, УКМК да «жок, бул миллион доллар сеники» деген жүйө менен сотко өткөрүп берген.

 Эми болсо экс-вице-премьер-министр Дүйшөнбек Зилалиев Бишкектеги СИЗО-1 мекемесине кайрадан киргизилди. Бул тууралуу Биринчи май райондук сотунун басма сөз кызматы кабарлады. Маалыматта айтылгандай, Бишкек шаарынын Биринчи май райондук сотунун 17-мартындагы токтомуна ылайык, айыпталуучу Зилалиевке карата бөгөт коюу чарасы катары камакка алуу түрү тергөө мөөнөтүнө, башкача айтканда 15-май күнүнө чейин тандалды жана ал Кыргыз Республикасынын Юстиция министрлигине караштуу ЖАКнин №21-мекемесине камакка алынган.

Эске салсак, УКМК козголгон кылмыш ишинин алкагында Өнөр жай, энергетика жана жер казынасын пайдалануу мамлекеттик комитетинин мурдагы жетекчиси Дүйшөнбек Зилалиев кармалганын 15-мартта кабарлаган.Атайы кызматтын маалыматы боюнча, ал 2017-жылы аталган комитетти башкарып турганда ыйгарым укуктарына таянып, пайдалуу кендери бар жерлерге лицензия берүү маселесин чечип берүүнү убада кылып, Б.Р. аттуу жарандан 50 миң АКШ доллары өлчөмүндө акча алганы аныкталган, бирок Зилалиев айтылган убадаларын аткарган эмес жана алган акчасын кайтарып берген эмес.

Зилалиевге 2020-жылы Башкы прокуратура 2010-2017-жылдары мамлекеттик органдарда жетекчилик кызматты ээлеп тургандагы ишмердүүлүгү боюнча «мыйзамсыз баюу» беренесинин негизинде кылмыш ишин козгогон. Ал Биринчи Май райондук сотунун чечими менен Жазык кодексинин 323-беренесинин 2-бөлүгүнүн негизинде күнөөлүү деп табылып, жети жылга кесилген. Кийин 2021-жылы 23-июнда Жогорку сот Зилалиевге «мыйзамсыз баюу» боюнча коюлган айыпты жокко чыгарып, ишти кайра кароого Бишкектин Биринчи Май райондук сотуна жөнөткөн.

Азизбек КЕЛДИБЕКОВ, NazarNews.kg