www.NazarNews.kg NazarNews - дүйнө назарында! www.NazarNews.kg NazarNews - в центре мирового внимания! www.NazarNews.kg NazarNews - ترى العالم في عينيك www.NazarNews.kg NazarNews - 你眼中的世界! www.NazarNews.kg NazarNews - dünya gözünüzde! www.NazarNews.kg NazarNews - The world in your eyes! www.NazarNews.kg Биздин байланыш: +996 779 028 383 www.NazarNews.kg Email: [email protected] www.NazarNews.kg WhatsApp кабар: +996 779 028 383 www.NazarNews.kg
Кыргыз тили боюнча мыйзамга каршы чыккан Көкүлов Улуттук тил комиссиясынын төрагасы Каныбек Осмоналиевке: "Кыргыз тили боюнча мыйзам - популисттик! Врачты кыргызча үйрөтсөңөр эле, ал жакшырак дарылап калмак беле", - деп атырылып, титиреңдеп чыныгы жүзүн көргөздү. Кызык окуя врач орусча же англисче сүйлөсө жакшы дарылап, ал эми эгемендүүлүктөн соң да өз нугуна түшпөй жаткан кыргыз тилинде сүйлөсө дарылай албай калабы? Кыргызстанда жашап кыргыз тилинде сүйлөгөн адам, ал кыргызбы, оруспу, өзбекпи, казакпы кор болбойт. Мен жашаган Таш-Дөбө (мурунку Воронцовка) айылында кыргыздын түшүн жооруган орус тилдүүлөр бар. Ал эми тектеш түрк, казак, өзбектерди мындай койолу. Орустар кыргызча таптаза сүйлөп жатса, биз көчүп келген алгачкы жылдары таң калып оозумду ачкам. Демек кыргызча деле орустар сүйлөсө болот тура деп. Алар менен кыргыз тилинде эле сүйлөшөбүз. Болбосо көпчүлүк жерлерде ончакты кыргыз болуп жалгыз орус турса орусча сүйлөгөн кыргыз эмеспизби.
Кыргыз тили боюнча мыйзам азыркы убакта эң зарыл мыйзам. Башка мыйзамды башка урабызбы, кыргыз тили боюнча мыйзамга кыргыздар тескери көз карашта болуп жатса. Айтор тантыраган Көкүлов дагы тантыды. Бул баланы эмдиги шайлоодо шайлабай турган нигилист экени билинди. Өз эне тилин сыйлабаса, Жогорку Кеңеште эмне отурат? Кетсин, ордун башка жаштарга берсин!
«Министрлер кыргыз тили боюнча тесттен кантип өтүп жатышат? Тили сынган министрлерди көрүп жатабыз»,- деди депутат «самый ходжа» Самыйкожо Мамлекеттик тил жана тил саясаты боюнча улуттук комиссиянын төрагасы Каныбек Осмоналиевге.
«Таалуу жерден суроо берип жатасыз. Норма боюнча министр баш болуп кыргыз тесттен өтүшү керек. Өтүп жаткандары бар. Биз министрликтердин баардык аппараттарына жат жазуу жаздырдык. Жыйынтыгын бердик. Биз ойлогондой баары катастрофалык абалда эмес экен. Жакшы эле жазып жатышат»,— деди ал.
«Атасы жакшы киши эле деп өтүп кетпей элеби»,- деди депутат.
«Тестте, жат жазууда андай болушу мүмкүн эмес. Дароо жазып, текшерилет»,- деди Осмоналиев.
Негизи Эрулан Көкүлов ашканада эле таракан издеп жүрсө болмок экен. Жогорку Кеңештин депутаты болгонго деңгээли анчейин өсүп жете электигин көргөздү. Эл үчүн пайдалуу маселе көтөргөнгө жараган жок. Эки жыл болгону калды Гүлзат Мамытбекке асылгандан бөлөк, кыргыз тилине байланышкан мыйзамдарга каршы чыгып титиреңдегенден башка чеке жылыткан ишин көрбөдүк.
Эң кур дегенде өзү депутат болгонго чейин тазалыкка шылтоолоп ашкана аңтарган азык-түлүк, тамак-аш коопсуздугуна байланыштуу бир мыйзам жазган жок. Куру популист экенин далилдеп бүттү. Өзгөчө ар дайым кыргыз тили боюнча мыйзам келсе эле каршы чыкканын көргөндө, кыргыз экенинен дагы шек санап кетесиң го...
Парламент депутаты десе эле көктөгү адам катары эсептебеши керек. Парламент депутаты да жүк, эл үчүн кызмат кылган оор жүк. Мунун эл депутаты Көкүлов кандайча чечип жатат? Депутаттарды эмне үчүн шайлайбыз? Албетте, эл үчүн кызмат көрсөтсүн деп. Жогорку Кеңеште токсон депутат бар, кээ бирөө кан ыйласа да эл үчүн бирдеме деп өз ойлорун айтып жатат. Рахмат, ушундай оор кырдаалдарга карабай депутаттардын ар кандай маселе көтөрүп жатканы туура. Кыргыздын башына оор кырдаал нечен келген, нечен кетти. Ошого карабай айлык эки эсеге көбөйүп, баанын кымбаттаганын тоготпогон депутаттар бар экени белгилүү. Депутаттардын айлыгы көбөйсө депутат эместерге эмне шам, бирок иштеп аткан депутаттар толтура, иштебей эле өз көлөкөсүн көрсөтүп чамгарактап жүргөн Көкүлов сыяктуу депутаттар да толтура.
Элге белгилүү коомдук активист, сазда тыгылып жаткан Көкүловдун баткагын тазалап, парламенетке депутат кылгандардын бири Гүлзат Мамытбек: «Негатив жараткан Эрулан элге өлүм алып келет» деп үшкүрүп отурат. Ал Жогорку Кеңеште аял кишиге теңелип ыйык трибунадан элдин маселесин көтөрбөй, жалжаңдап, жок дегенде кызматтык этиканы сактабай курулай пиардын арты менен дөдөй электоратына таянып депутат болгон Эрулан Кокулов боюнча төмөндөгүчө жооп берди: «Эрулан иниме боорум ооруйт. Ал адамдын жаман жерин издеп, негатив жаратып жүрүп бир жамандыкка кабылып калбаса экен деп тилейм. Себеби дегенде, позитив тартуулаган адам — адамдарга жашоо тартуулайт, ал эми негатив жараткан адам — элге кайгы менен кошо өлүм алып келет. Бул илим менен тастыкталган. Мен 24 жашымда бизнес баштаганда Эрулан инимдин мурдунан маңкасы агып жүргөн. Ал бизнестин көйгөйүн, анын тургузулган жана сакталышы жөнүндө таптакыр түшүнүгү жок», - деп билдирди.
Жакында Жогорку Кеңештин Бюджет жана экономика комитетинин отурумунда Эльвира Сурабалдиева "Не сахар" аталышындагы берүүнү алып барган, өздөрүн журналист санашкандар ишкерлерди текшергенге укугу барбы деген маселени көтөргөн. Анын кожоюну Эрулан Көкүлов экенин да айткан. Мындай кыйыта айткандын да себептери бар «Не сахар» деп койсо эле булар бардык нерсени текшерүүгө болот дешип тойтолоңдоп өздөрүн президенттен кийинки адамдай сезишип бардык нерселерди текшерүүгө өтүштү.
Алсак Көкүловдун "Не сахар" берүүсүнүн балдары Сурабалдиевага тиешелүү машинанын тетиктерин саткан "Кудайберген" базарына жетип барышып, бул базарды текшерүүгө алышты. Мындай жорукту көргөндөр, депутат айым баш болуп "эмне тетиктердин мөөнөтү өтүп, эскирип кеткенин текшеришкени барышыптырбы" деп алардын бөрк ал десе, баш алат" болгон кылыктарына таң калышты. Чындыгында, акылга сыйгыс иш эмеспи. Андан да Салык кызматынын ролун аткарып ККМ текшеребиз дешкени кызык. Өзүнчө эле анекдот, болуп бараткандай деги аларга бардык жерди текшерүүгө ким укук берди. Парламент депутаты Көкүловбу?
Эрулан Көкүлов бир жарым жылдан бери депутат болуп отурат, эмнеге элдин ден соолугун, саламаттыгын ойлосо тамак-аш коопсуздугу боюнча мыйзам жазып киргизе элек. Эмнеге ашкана иштеткен коомдук жайлардын тазалыгына көңүл бурулбай жатканы боюнча Санэпидемстанциянын ишмердүүлүгү тууралуу бир да жолу маселе көтөргөн жок. Демек, андай кызыкчылыгы жок. Депутат Эльвира Сурабалдиева дал ушул жагдайды ташка тамга баскандай таасын түшүндүрүп айтты. Эми Көкүлов эсине келээр. Конституцияда жеке менчик кол тийгис. Аны ар ким эле текшерип, чокчоңдой бергенге укугу жок. Ушуну депутат Көкүлов түшүнбөй жатканы кызык. Түшүнсө да эл өкүлү, кесиптеши Эльвира Сурабалдиева "Арча медиага" кыйытып айткандай "заказ" жыттанган иштерге кынык алып алган. Болбосо, мыйзамдуу жолдор менен элге кызмат кылуунун үлгүсүн көргөзмөк.
Азизбек КЕЛДИБЕКОВ, NazarNews.kg