Кыргызстандын ушул эки айдын аралыгында саясатчылар бири-бирине ак калпак кийгизип, аргымак мингизип бири-бирине болгон сезимдерин арнашып кошулуп анан ажыраша башташат. Айрымдары Бакыт Төрөбаевге окшоп депутаттыктан баш тартат. Бул тууралуу маалыматты Бакыт Төрөбаев өзүнүн социалдык тармагына жазып чыкты.

--Көп адамдар "Өнүгүү-Прогресс" партиясы бул шайлоого барбай калды, өзүңүз жеке башка партия менен барасызбы?-деп сурап жатышат. Ушул суроого өзүм жооп берип коюууну туура көрдүм. Эгерде артка кылчайып карасак, 25 жылдан бери шайлоолорго катышып жүрдүм. Биринчи шайлоолордо атам Эргеш Төрөбаевичтин атынан бирден шайлоо участкаларында жооптуу болдум, андан соң айыл өкмөт, кийин шайлоо боюнча штабды жетектедим. Такшалгандан кийин өзүм жаңы саясий партияны түптөп, жергиликтүү кеңештерге, Жогорку Кеңешке жана Президенттик шайлоолорго катыштым. 1995-жылдардагы шайлоочунун көз карашы бүгүнкү күнгө чейин кандай өзгөргөндүгүнө өзүм күбө болдум.

Алдыдагы шайлоо боюнча.

Чындыгын айтканда, учурдагы пандемияга байланыштуу мен парламенттик шайлоого сарптала турган акча каражатты элге, медицина жана билим берүү тармактарына, жеке ишкерлерди өстүрүү жана өсүп келе жаткан жаш уул-кыздардын аң-сезимин жакшы жака өзгөртүү боюнча иш чараларга жумшайын деп чечтим. Чындыгында бул шайлоодо акча каражаттын атаандаштыгы болот, акча каражат көп кетет. Бүгүнкү күндө шайлоочунун көз карашында программа, идея жөнүндө эмес, ким канча берет экен деген суроону көп берип жатышат. Ал эми жалган саясатчылардын жеке кызыкчылыгы мамлекеттин кызыкчылыгынан жогору болуп калды. Бул жакшы эмес көрүнүш. Жогорку Кеңештин VII-чакырылыштагы парламентти реформа жасаган, өзгөртүү кылган парламент болооруна менин көзүм жетпейт. Ошол себептен 5 жылдын аралыгында кийинки парламенттик шайлоого, биз шайлоочунун оюн, ой жүгүртүүсүн, мамлекетке болгон көз карашын жакшы жакка өзгөртүү боюнча иштерди алып барабыз. Ошондуктан, бул шайлоого мен жеке өзүм катышпайм. Элди алдап парламентке келүү менин мүнөзүмө туура келбейт. Бирок, биз саясий процесстерде өз үнүбүздү угузганга, өкмөттүн, бийликтин кылган иштерине жардам берип, туура эмес болгон жерде сын айтып, ошону менен иш алып барабыз. Жалпы биздин тарапташтарга, жалпы жарандарыбызга терең ыраазычылык билдирем! - деди, экс депутат. Бакыт Төрөбаевдин бул пикири коомчулукта анчалык деле талкуу жараткан жок. Болгону ал өзүнүн пикирин ачык айтып “балп” этип койгондой кабыл алды. 

Эми ашкана баатыры Сыймык Жапыкеевге келе турган болсок Жогорку Кеңештин астанасын аттамак тургай жазган ак барак кагазы таштандыга кетип, арасат жолдо калды. Бул көрүнүшкө анын ойку-кайкы сүйлөгөн тилинин азабы болду окшойт. Алгач социалдык тармакка түз эфирге чыга баштаганда коомчулуктун көпчүлүгү колдошкон, кийин эле ачууга алдырып кыйкырып сүйлөп, олтурган жеринде обдула бергендиктен кыраакы кыргыздар анын ким экенин түшүндүбү айтор, акырын Жапыкеевдин айланасынан кача баштады. Ошентип, учурда Сыймык Жапыкеев эркектик сабырдуу мүнөзүн көрсөтпөй, бакырык менен чакырык таштап “катын ушак” менен алек болууда.

Булак: NazarNews.kg