Ушул жумада курала турган жаӊы өкмөттүн курамы 22 министрлик-мекемелерден 16га чейин кыскара турганын бүгүн өкмөт башчылыкка талапкерлиги Жогорку Кеӊештин көпчүлүк коалициянынын жыйынында жактырылган Улукбек Марипов билдирди.

Ал бул тууралуу: «Бүгүнкү күндө өкмөттүн курамы абдан чачыранды. Бир топ вице-премьерлер бар. Эгер менин талапкерлигимди колдоп берсеңиздер өкмөттүн курамын, түзүмүн спикерге киргизүүнү пландаштырып жатабыз. Анда өкмөт 22ден 16га чейин кыскарат. Өкмөткө караштуу мамлекеттик агенттиктер, фонддор, мекемелер боюнча кардиналдуу реформалар жүрөт».- деди.

Маселен, Каржы министрлигине: Бажы, Салык кызматтары баштаган бир катара мекемелер бириктирилет. Бир сөз менен айтканда бул министрликтин курамы, түзүмү жана статусу да күчөтүлөт. Ал эми бул министрликтин макамы вице-пермьер министрдин деӊгээлинде болоору айтылууда. Бул тууралуу толук маалыматты өкмөт эртеӊ, бүрсүгүндөн баштап коомчулукка расмий түрдө жарыялап башташат. Бул абдан баалуу, абдан «майлуу» Каржы министрлигин Улукбек Карымшаков жетектей турганы маалым боло баштады. Карымшаков 2015-жылдан бери аталган министрликте министрдин орун басары болуп иштейт.

Карымшаковдун өмүрү баяны төмөндө толугу менен:

• Туулган күнү: 1963-жылдын 22-январы
• Улуту: кыргыз
• Туулган жери: Ош областынын Кара-Кулжа району
• Билими– жогорку: 1981-жылы Фрунзе финансы-экономикалык техникумун, 1989-жылы Кыргыз мамлекеттик университетинин экономика факультетин артыкчылык дипломдору менен аяктаган.
• Кошумча алган билими: «Мамлекеттик ресурстарды пландоо жана башкаруу» (Австрия, Вена шаары, 1999-ж.), «Коргонууга кетчү чыгашаларды пландоо жана башкаруу» (АКШ, Монтерей шаары, 1999-ж.), «Мамлекеттик чыгашалар саясаты» (Австрия, Вена шаары, 2001-ж.), «Мамлекеттик сектордогу бюджеттик процесс» (Швеция, Стокгольм шаары, 2009-ж.) ж.б. финансылык маселелер боюнча окуу семинарлары.
• Тилдерди билүүсү: Кыргыз тили (эне тили), орус тили (эркин), англис тили (сүйлөө деңгээлинде).
• Кошумча маалымат: Финансы-экономика кызматынын отличниги
• Чен даражасы: Мамлекеттик кызматтын I даражадагы кеңешчиси

Булак: NazarNews.kg