- Бек мырза, жашооңузду бильярдсыз элестете аласызбы?

– Бильярд ойноп жүргөнүмө 10 жылдан ашты. Бул оюн менен убакытты көңүлдүү өткөрөм, эс алам дегендей. Бильярд таптакыр ойнобой коюп деле жашай алам. Мындайча айтканда, бекерчинин иши да.

-Мурутуңузду кырып салууга даярсызбы?

– Ушул мурутумду көбү ойлошсо керек, Бектин «фирменный» стили деп. Чынында, андай эмес. Мурутумду идеалдаштырбайм. Бир нече айлап мурутум жок деле жүрө берем.

-Сизди сахнага арак ичип чыгат деп айтышат. Бул чынбы?

– Негизи, арак ичип чыгып көргөм. Бирок ичип алсам ырдын сөздөрүн унутуп, ырдай албай калат экенмин. Сахнага чыгарда эч кандай ырым-жырым колдонбойм. Концерт жакшы өтсүн деп бата кылып чыгам.

-Өзүңүздү сексуалдуумун деп эсептейсизби?

– Мен өзүмдү сексуалдуумун деп эсептебейм. Эми өзүмдү-өзүм сексуалдуумун десем уят го.

-Бажыда иштеп жүргөндө пара алгансызбы?

– Мен бажыда пара ала турган кызматта деле иштеген эмесмин, чынында. Бир бөлүмдү жетектегем. Ооба, пара алгам деп айтсам да эч ким ишенбейт.

-Депутат болгуңуз келеби?

– Келечектеги пландарымда саясатка аралашуу бар. Ошондуктан бул суроого ооба деп жооп берем. Кийин дагы депутаттыкка талапкерлигимди коюп калсам, «баягыда жок деп жооп бергенсиң» деп жүрүшпөсүн.

-Кримчөйрөдө достору бар дешет. Бул да чынбы?

– Чыгармачыл адам болгондон кийин коомдун түрдүү катмарындагы өкүлдөрүнүн жакшылык-жамандыктарына барууга туура келет. Аталган чөйрөдө деле ыр сүйгөн, ырчылардын талантын баалагандар бар. Алар менен ысык мамиледе болбосок да, тааныштарданбыз.

Маржан Назарбаева, NazarNews.kg