31-август жана 1-сентябрда Бишкектеги бир катар соода борборлору менен базарлар иштебейт. Мындай чечимди Бишкек мэриясы 18-августта Координациялык комиссиянын жыйынында кабыл алды.

Маалыматка ылайык, бул чаралар коомдук коопсуздукту камсыз кылуу жана Шанхай кызматташтык уюмунун саммитине, ошондой эле 2026-жылдагы Дүйнөлүк көчмөндөр оюндарына шаарды даярдоо максатында көрүлүүдө.

Муниципалитеттин чечимине ылайык, расмий делегациялар өтүүчү маршруттарда жайгашкан төмөнкү соода борборлорунун иши 31-август жана 1-сентябрда убактылуу токтотулат:

ГУМ «Чынар»;

ЦУМ «Айчүрөк»;

«Бишкек Парк»;

«Азия Молл»;

«Ала-Арча»;

VEFA;

«Соода үйү»;

«Гоин»;

«Beta Stores 1»;

«Беш Сары Сити».

Ошондой эле:

«Ош базары» жана «Сары-Өзөн» базарлары 31-август, 1–2-сентябрда иштебейт;

«Орто-Сай» базары 31-август жана 1-сентябрда жабык болот.

Мындан тышкары, 29-август күнү саат 15:00дөн тартып төмөнкү жер алдындагы жөө адамдар өтүүчү өтмөктөр жабылат:

Чыңгыз Айтматов проспектиси менен Горький көчөсүнүн кесилиши;

Чүй проспектиси менен Чыңгыз Айтматов проспектисинин кесилиши;

Манас айылы — Васильев тракты (азыркы Манас көчөсү);

Чүй проспектиси менен Абдрахманов көчөсүнүн кесилиши (Old Bishkek).

Төрт административдик райондун башчыларына делегациялар өтүүчү маршруттардагы кошумча соода түйүндөрүн аныктап, алардын ишин да убактылуу токтотууну камсыз кылуу тапшырылды.

Кыргыз Республикасынын Эгемендүүлүк күнүнүн 35 жылдыгын белгилөөгө байланыштуу укук коргоо органдарына адамдар көп чогулган жерлерде коопсуздукту камсыз кылуу милдети жүктөлдү. Ал эми муниципалдык инспекцияга мыйзамсыз көчө соодасына жол бербөө боюнча чараларды көрүү тапшырылды.

Комиссиянын жыйынында ошондой эле шаардык кызматтар бул күндөрү күчөтүлгөн режимде иштеши керектиги айтылды. Коомдук транспорт үзгүлтүксүз каттап турушу зарыл. Дүйнөлүк көчмөндөр оюндарынын ачылыш аземине барууну каалагандар үчүн атайын шаттл-автобустар уюштурулат.