Акыйкатчы институту укук коргоо органдарын аэропортто милиция кызматкерлери тарабынан кармалган келиндин укуктарын сактоону камсыздоого чакырды.

Буга чейин кармалган аялдын апасы милиция кызматкерлери кызынын ымыркай баласы бар экенине карабай кармап кетип, анын укугун бузганы тууралуу ЖМКга билдирген. Милиция берген маалыматка таянсак, аял издөөдө жүргөн жана аны Кылмыш кодексинин 209-беренеси боюнча кармашкан.

Акыйкатчынын Ош облусундагы ыйгарым укуктуу өкүлчүлүгүнүн кызматкерлери убактылуу кармоочу жайда кармалган келинге барышкан. «Ал Бишкектеги ооруканалардын биринде кайра жандандыруу бөлүмүндө оор абалда жаткан баласы үчүн тынчсызданып жатканын айтты. Институттун кызматкерлери Бишкектеги аялдын баласы жаткырылган оорукананын жетекчилиги менен байланышты. Дарыгерлер берген маалыматка таянсак, баланын абалы оор, ал реанимация бөлүмүндө жатат. Акыйкатчы институту бала менен аялдын укуктарын сактоону камсыздоого чакырат. Институттун кызматкерлери келиндин ишин мониторинг кылууну улантат»,— дешти.

“Кармалган аялдын жашы элек төрт баласы бар. Жолдошу менен ажырашып кеткен. Сотту ушул жагдайларды эске алууга жана камак менен байланышпаган баш коргоо чарасын тандап алууга чакырабыз”,-дейт Токтосунова.

• Ири суммадагы алдамчылыкка шектүү аял жаӊы төрөгөн баласын ооруканага таштап, Түркияга качуу үчүн аэропортко келгенде кармалган. 6-сентябрда айрым маалымат каражаттары шектүүнүн апасынын айтканын жазып чыгышкан. Анда апасы журналисттерге маалымат берип, анын кызын мыйзамсыз камап койгондугун билдирген.
• Бул факты боюнча Ош ШИИБ маалымат таратты. Милиция кызматкерлери тарабынан кармалган 1991-жылы туулган жарандын үстүнөн Ош шаарынын 4 жашоочусунан арыз түшкөн. Алардын арызына ылайык, 4 жабырлануучулар ири суммадагы акчаларын алдатышкан. Тагыраак айтканда, шектүүгө 538 миӊ, 40 миӊ, 50 миӊ жана 70 миӊ доллар (жалпы суммасы 698 миӊ доллар) акча каражаттарын беришкен. Анткени шектүү аларга ири партиядагы балдар кийимин жана иштеп жаткан тигүү цехин сата турган болуп, алдаган. Анын бул кылмыштуу аракетинен улам алдамчылык беренеси (209-берене) менен кылмыш иши козголгон. Тергөөчү тарабынан бир нече ирет чакырылгандыгына карабастан, келбестен өзү жашап турган Өзгөн районунан Бишкек шаарына качып кеткен.
• Бишкек шаарында баласын ооруканага медицина кызматкерлерине айтпастан таштап чыгып, Бишкек-Стамбул багыты боюнча кылмыш жоопкерчилигинен качып бара жаткан учурда кармалган жана Ош шаардык ички иштер башкармалыгына жеткирилген. Бишкектеги оорукана жетекчилиги тарабынан өз баласын таштап кеткендиги боюнча акт түзүлгөн.

 Булак: NazarNews.kg