Ысык-Көл облусунун Чолпон-Ата шаарында Көз карандысыз мамлекеттер шериктештигине мүчө өлкөлөрдүн Парламенттер аралык ассамблеясынын (КМШ ПАА) Контролдук-бюджеттик комиссиясынын кезектеги отуруму өттү. Бул тууралуу Жогорку Кеңештин басма сөз кызматынан билдиришти.

Маалым болгондой, жыйындын күн тартибинде КМШ ПААнын ишмердүүлүгүн каржылоо, бюджетин түзүү жана аны аткаруу маселелери каралды.  

Иш-чаранын ачылышында Жогорку Кеңештин төрагасынын орун басары Джамиля Исаева сөз сүйлөп, өткөрүлүп жаткан отурумдун маанилүүлүгүнө токтолду. Ошондой эле мамлекеттер аралык байланышты чыңдоодо парламенттик диалогдун ролу чоң экенин белгилеп, КМШ ПААнын алкагында аткарылчу иштерге токтолду. Муну менен катар Армения, Азербайжан, Беларусь, Казакстан, Россия жана Өзбекстан мамлекеттеринен келген ассамблеянын Контролдук-бюджеттик комиссиясынын мүчөлөрүнө ийгиликтерди каалады.  

Ал эми отурумдун картышуучуларына экономика министри Данияр Амангельдиев кыргызстандын учурдагы социалдык-экономикалык абалы тууралуу кеңири маалымат берди.  Андан сырткары, Демократияны, парламентаризмди өнүктүрүүгө жана КМШга мүчө мамлекеттердин жарандарынын шайлоо укуктарын сактоого мониторинг жүргүзгөн эл аралык институттун Бишкектеги өкүлчүлүгүнүн баяндамасын угушту. 

Жыйындын соңунда комиссиянын мүчөлөрү КМШ ПААнын 2023-жылга карата сунушталган иш планын бекитишти.

Белгилей кетсек, КМШ ПААнын Контролдук-бюджеттик комиссиясынын кезектеги жыйыны комиссиянын төрагасы, депутат Искендер Матраимовдун демилгеси менен Чолпон-Ата шаарында уюштурулган.

Булак: NazarNews.kg