Орусияда чет элдик жарандардын жүрүү мыйзамдуулугуна жана алардын миграциялык мыйзамдардын талаптарын сактоосуна көзөмөл күчөтүлдү. Бул тууралуу Кыргызстандын Россия Федерациясындагы элчилиги билдирди.

Дипломатиялык өкүлчүлүк кыргызстандыктарды Россиянын мыйзамдарын так сактоону жана жасалган кылмыштар үчүн жазанын сөзсүз болушун эстен чыгарбоосун өтүнөт.

Элчилик мекендештерди расмий документтерди (паспорт, айдоочулук күбөлүк) жана Россияда жүрүүгө башка уруксаттарды (анын ичинде “каттоо” деп аталган) тариздөөдө ортомчулардын кызматынан пайдаланбоого чакырат.

Ошондой эле Россиянын аймагына кирген күндөн тартып 30 күндүн ичинде иш жүзүндө жашаган жери боюнча миграциялык каттоого туруу зарыл.

«2021-жылдын 29-декабрынан кийин Орусияга иштөө максатында келгендер кирген күндөн тартып 30 күндүн ичинде милдеттүү мамлекеттик манжа изин каттоодон, сүрөткө тартуудан жана медициналык текшерүүдөн өтүшү керек. Россия Федерациясынын Эмгек кодексине ылайык, иштөө үчүн иш берүүчү менен келишим түзүү зарыл. Өзүңүз менен кошо өзүңүздү тастыктаган документтерди (Кыргызстандын жаранынын паспорту) жана Россия Федерациясында жүрүү укугун тастыктоочу документтерди (миграциялык карта, OMS/VHI полиси) алып жүрүңүз. Жүргөн өлкөнүн бийлигине урмат көрсөткүлө», — деп эскертет дипломатиялык өкүлчүлүк.

Тез арада юридикалык жана консулдук жардам талап кылынган учурларда күнү-түнү иштеген ишеним телефонуна +79251155047 кайрылыңыз.