Түркиянын президенти Режеп Тайип Эрдоган Орусия менен Украинаны Кара деңизди аскердик аренага айландырбоого чакырды. Ал бул тууралуу 13-декабрда Түркмөнстандан кайтып келе жаткан учакта журналисттер менен болгон маегинде айтты.

«Бул Орусияга да, Украинага да пайда алып келбейт», - деди ал.

Түркмөнстанда Эрдоган Орусиянын президенти Владимир Путин менен жолугушту.

Эрдоган ошондой эле Путин менен жолугушуудан кийин АКШнын президенти Дональд Трамп менен тынчтык планын талкуулоону пландап жатканын билдирди.

Түркиянын Тышкы иштер министрлиги ошол эле күнү Орусия менен Украинаны Кара деңиздеги аскердик операцияларды токтотууга чакырды. Анкара Одесса аймагындагы Кара деңиз портуна дагы бир орусиялык чабуул жасап, чет элдик кемеге зыян келтиргенин белгиледи.

"Алдын ала маалыматтарга караганда, экипаж мүчөлөрү жана жүк ташуучу унаалардын айдоочулары эвакуацияланды, түрк жарандары жабыркаган жок", - деп билдирди министрлик.

Бир күн мурун Киев Одесса аймагындагы порт инфраструктурасына орусиялык аба соккусу тийип, түрк кемесине зыян келтирилгенин билдирген. Түркиянын Cenk кеме компаниясынын маалыматы боюнча, кеме мөмө-жемиштерди жана башка азык-түлүктөрдү ташып бара жаткан.

Акыркы жумаларда Кара деңизде орусиялык жүктөрдү ташып бараткан кемелерге бир катар кол салуулар болгон. Атап айтканда, 2-декабрда Орусиядан Грузияга жүк ташып бараткан Midvolga 2 танкерине Түркиянын жээгинен болжол менен 80 деңиз милясы (болжол менен 148 км) алыстыкта ​​​​кол салуу болгону кабарланган.

28-ноябрда Кара деңиздеги Босфор кысыгынын жанында Гамбия желеги илинген эки "Кайрос" жана "Вират" танкерине кол салуу болгон. Түркиянын Жээк күзөт кызматкерлери кол салуудан кийин өрт чыккан "Кайрос" кемесинен 25 экипаж мүчөсүн эвакуациялашкан. Түркиянын транспорт жана инфраструктура министри Абдулкадир Уралоглунун айтымында, 20 экипаж мүчөсү бар "Вират" коркунучта болгон эмес. Reuters агенттигинин маалыматы боюнча, эки танкер тең Орусиянын "көмүскө флотунун" бир бөлүгү жана Батыштын санкцияларына кабылган.

Алибек Бейжанов, Ташкен