Россияга каршы санкциялардын айынан жүздөгөн европалык ишкана иштебей турат... Европа деиндустриализациядан кеп козгой баштаганын белгилейт Наталья Дембинская. Серепчинин ушул туурасындагы материалын РИА Новостисайты жарыялаган.

Азайган мунай көлөмү

Bloomberg агенттиги Гронингендеги кен казуу кайра ачылбай турганын маалымдады. Нидерланд өкмөтү ушундай чечимге келди. Мындай жагдай рынокко дароо таасирин тийгизип, көгүлтүр оттун 1000 кубу 560 долларга чейин көтөрүлүп кетти. Бул марттын аягындагы деңгээл, ал эми кен казуу төрт айга — 1-октябрга чейин жабылат. Аталган кен чөлкөмгө экологиялык залалын бир топ тийгизген. 2012-жылдан бери Гронингендин жака-белиндеги үч миңден ашуун үйдү түрттүрүшкөн, себеби ал жакта жашоо кооптуу болуп калган эле.

Өкмөт жабыр тарткандарга 30 жыл аралыгында 22 миллиард евро компенсация төлөп берүүгө убада берген. Гронинген кени 1963-жылдан бери казылып келди. Батыш Европа үчүн маанилүү ресурс эле. Бирок кендин көлөмү барган сайын азайгандан азайып отурган.

2013-жылы 53,9 миллиард куб метр казылганын эскерет каржылык талдоочу Марк Гойхман. 2021-жылы Nederlandse Aardolie Maatschappii агенттиги өндүрүш 6,5 миллиардды түзгөнүн кабарлаган. Ал эми чөлкөмдө газды жалпы керектөө — 480 миллиард. 15-июнда катуу көтөрүлүп кеткен баа кайра төмөндөдү. Анткен менен соңку жылдары Гронингендин салымы анчейин деле көп эмес, эки пайыздан ашпайт. Албетте, бул деле катуу кыйноого салбайт. Суюлтулган жаратылыш газы, үнөмдөө жана башка чаралар жардамга келет. Анан да европалык сактоочу жайлар 78 пайызга толгон. Ошентсе да рынокто кырдаал чыңалып турат.

Энергетикалык ресурстар менен жабдуудагы көйгөйлөр

Мээ кайнаткан ысыктын айынан Европадагы салкындаткычтар катуу иштеп, электр кубатын пайдалануу кескин өсүп кетти. Ошондой эле суюлтулган табигый газ алуучу ишканаларда сезондук ремонттук иштер, Норвегиянын түндүгүндөгү Hammerfest заводундагы кырсыктын да таасири жок эмес. Ал жакта экспорт июлдун ортосуна дейре чектелген. Бул эртеңки күнгө ишенимди өчүрөрү ырас, себеби Норвегия россиялык импорттун азайышынан кийин маанилүү булак болуп калганын белгилейт Bloomberg агенттиги.

Көз карандысыз өнөр жай эксперти Леонид Хазанов бул жагдай Европага жакшылык алып келбей турганын айтат. "Гронинген Нидерланддагы ички керектөө үчүн маанилүү болчу. Эми ал да башкаларга окшоп импорттон көз каранды болуп калат. Кошмо Штаттардан, Катардан, Нигерия, Азербайжан жана башка мамлекеттерден сатып алчу газдын көлөмүн көбөйтүүгө аргасыз болот", — деп түшүндүрөт ал.

Баасы да, болду-болбоду, кымбаттап, Европадагы энергетикалык каатчылыктын кезектеги эпкинине кептей турганын боолголойт Хазанов.

Булак: NazarNews.kg