АКШ долларынын дүйнө жүзү боюнча мажбурлоочу курал катары колдонулушу андан баш тартуунун глобалдык тенденциясын козгоп жатат. Бул тууралуу Кытайдын Global Times гезити билдиргенин "Известия" басылмасы жазды.

"АКШ доллар үстөмдүгүн курал катары колдонуп, башка өлкөлөргө өзүм билемдик менен бир тараптуу санкция киргизип чектелбестен, өзүнүн экономикалык тобокелдиктерин акча монополиясы аркылуу башкаларга жүктөп коё алат. Америка өзү доллар доорунун аякташына түрткү берип жатканы көптөгөн жергиликтүү стратегдерди жана экономисттерди тынчсыздандырууда", — деп айтылат макалада.

Серепчилер Батыштын Россияга каршы киргизген санкциялары АКШнын үстөмдүк амбициясы экенин жана бул башка мамлекеттерди доллардан азыраак көз каранды болууга үндөп жатканын жазышкан. Басылма белгилегендей, бул батыш өлкөлөрү Вашингтондун "акчалай мажбурлоосунан" бошонуу үчүн SWIFT системасын башка нерсеге алмаштыруунун жолун издеп жатышат. Бул тенденция барган сайын айкын болууда.

GT басылмасы мисал катары Кытай менен Бразилиянын ортосундагы финансылык жана соода операцияларын улуттук валютада жүргүзүү боюнча келишимди келтирген. Анда дүйнөлүк тарыхта гегемониянын урашы көбүнчө өлкөлөрдүн өз валютасына өтүшүнөн башталат деп айтылган.

Буга чейин 26-мартта АКШ Конгрессинин өкүлдөр палатасынын республикачыл мүчөсү Марджори Тейлор Грин эгер доллар куласа, америкалыктар экономикалык көйгөйгө батарын айткан.

22-мартта TeleTrade аналитиги Владимир Ковалев рублдин негизги валюталарга карата алсызданышын биринчи кезекте тышкы жагдайлар менен түшүндүрдү. Анын айтымында, АКШдагы банк кризиси каржы рынокторунда туруксуздукту кескин күчөтүп, ошондой эле алдыңкы өлкөлөрдүн экономикасынын басаңдоо тобокелдиктерин күчөттү.

Ага чейин, 11-мартта, New York Post гезитинин серепчиси Жей Ньюман да Вашингтон эл аралык аренага кысым көрсөтүү мүмкүнчүлүгүн жоготуп жатканын, анткени санкциялар, анын ичинде Россияга каршы чектөөлөр долларга болгон ишенимди төмөндөтүп, аны алсыратып жатканын белгилеген.

Февраль айынын аягында Кремлдин маалымат катчысы Дмитрий Песков "Известия" менен болгон маегинде дүйнөдө дедолларизация процесси жүрүп жатканын, өлкөлөр "улуттук валюталарына көбүрөөк таяна баштаганын" билдирген болчу.