1794-жылы чыгарылган сейрек кездешкен күмүш тыйын сатыкка коюлду. Ал 2013-жылы 10 миллион долларга сатылган. Эми кайрадан жаңы рекорд коюуга даяр. Бул тууралуу "Грозный-информ" басылмасы жазды.

Агентствонун маалыматына ылайык, аталган тыйындын бир бетинде Эркиндиктин символу болгон аялдын сүрөтү, ал эми арткы бетинде АКШнын символу болгон ак баштуу бүркүт түшүрүлгөн.

"Бул тыйын мен сыймыктанган эң баалуу артефакт, андан айрылуу мен үчүн абдан өкүнүчтүү. Анын жаңы кожоюну менден да артык баалай алат деп ишенем", - деген тыйындын учурдагы кожоюну Брюс Морелан.

Бул күмүш тыйындан болгону 1758 даана чыгарылган. Бирок бүгүнкү күнгө чейин андан 130-140 даанасы гана сакталып калган. Бул тыйындар мартабалуу адамдарга сувенир катары берилип келген.
Булак: NazarNews.kg