Кара-Сууда адам өлтүрүүгө шектүү кармалды

Журналист: МЭЭРИМАЙ АЛЫБЕКОВА

24.06.2022, 15:34

23432

кылмыш жана кырсык

Кара-Суу районунда эркек киши карызы үчүн жаранды бычак менен сайып жиберген. Бул тууралуу Ош облустук милициясынан билдиришти.

Маалыматка ылайык, 23-июнда Кара-Суу райондук милициясына Кенжекул айылынан Кара-Суу райондук ооруканасына белгисиз жаран каза болгон абалда алып келингени боюнча маалымат түшкөн.

Аталган факт маалыматтардын электрондук журналына катталып, алгачкы текшерүү иштери башталган.

Ыкчам тергөө тобу окуя болгон жерге барып, 23-июнда саат 15:30дар чамасында Кара-Суу районунун Кенжекул айылынын кире беришинде 26 жаштагы С.Ж. менен 36 жаштагы У.А., аттуу жарандардын ортосунда карыз акча боюнча пикир келишпестиктен оозеки кайым айтышуу болгондугун, андан соң С.Ж. бычак менен У.А. аттуу жарандын денесине бир нече жолу сайып жибергендигин аныктаган.

Натыйжада У.А. алган жаратынан ооруканага жетпей каза болгон.

Текшерүүнүн жүрүшүндө маркумдун денесине кароо жүргүзүлүп, тийиштүү экспертизалар дайындалган.

Аталган факт Кылмыш-жаза кодексинин 122-берененин (“Киши өлтүрүү”) негизинде иш козголгон.

Жүргүзүлгөн ыкчам издөө иш-чараларынын натыйжасында шектүү С.Ж. кармалып, Кара-Суу райондук милициясынын убактылуу кармоочу жайына киргизилди.

Тергөө амалдары уланууда.

Булак: NazarNews.kg