Электр станциясынын күл топтоо дамбасынан чыккан аралашма дарыяга аккан
Дүйнө жүзүндө  |   |  354

11-февралда Казакстандын Темиртау шаарында жайгашкан КарГРЭС-1 электр станциясынын күл топтоо дамбасынан чыккан аралашма Нура дарыясына кошулуп жатканы тартылган видео Интернетке жарыяланган. Бул тууралуу Борбордук Азия жаңылыктары жазып чыкты.

Бийлик ошол эле күнү ал жерге Караганда облустук экология департаменти менен Өзгөчө кырдаалдар башкармалыгынын өкүлдөрү жана жергиликтүү аткаминерлер жөнөп кеткенин билдирди.

— Адистер суунун үлгүсүн алып, текшерүүгө жөнөтүштү. Анын жыйынтыгы менен булгануунун деңгээли аныкталат. Электр станциясына ээлик кылган Bassel Group компаниясында плансыз текшерүү жүргүзүлөт, — деди облустук экология департаментинин жетекчи орун басары Алибек Бекмухаметов.

Bassel Group компаниясы тиешелүү чаралар көрүлүп, аралашманын сууга кошулуусу токтотулганын билдирди.

1942-жылы ишке берилген КарГРЭС-1 Казакстандагы эң эски электр станциялардын бири. 2005-жылы аны Bassel Group компаниясы сатып алган. Негизги ишмердүүлүгү — Темиртау шаарындагы ишканалар үчүн электр жана жылуулук энергиясын иштеп чыгуу.

Булак: NazarNews.kg

Поделитесь с друзьями