Казакстандагы Түркстан облусунда жайгашкан Шардара ГЭСине (Сырдарыя) топтолгон сууга байланыштуу жергиликтүү тургундар тынчсыздана баштады. Бул маалыматты 9-январда Казакстандын Экология министрлигинин басма сөз кызматы тараткан.

Расмий маалыматта резервуардагы суунун деңгээлинин жогорулашы 2022-жылдын октябрынан декабрына чейин Кыргызстандагы Токтогул суу сактагычынан агып барган суунун көбөйүшү менен байланыштуу экени айтылат.

Декабрь айында Шардара суу сактагычына куюлган суунун деңгээли 880 м³/сек деп эсептелсе, факт түрүндө 1400 м³/сек. жеткен.

10-январга карата Шардара суу сактагычындагы суунун көлөмү 4070 млн м³ болуп, долбоордогу көлөмдөн 78 пайызга ашкан. Ошондой эле былтыркы жылдын ушул мезгилине салыштырмалуу 1683 млн м³ жогору. Коопсуздукту сактоо чаралары көрүлүп жатат.

Октябрь айынан тарта 13-январга чейин Токтогул суу сактагычындагы суунун чыгашасы 3,05 млрд м³ болгонун «Электр станциялары» ААК жарыялаган. Бул 2021-2022-жылдагы жылытуу мезгилине салыштырмалуу 19,5% жогору.

Катуу суукка байланыштуу 2023-жылы 13-январда суу сактагычтан агып чыккан суунун көлөмү тарыхый максимумду жаңылап, секундасына 881 м³ болгон.

Булак: NazarNews.kg