Казакстандын ири шаарлары Алматы менен Нур-Султан 19-марттан баштап карантинге алынат. Бул тууралуу казак басылмалары президенттин алдындагы өзгөчө кырдаал режимин камсыздаган мамлекеттик комиссиянын берген маалыматына таянып жазып чыкты.

Маалыматка караганда, карантин 19-март күнү саат 00:00дөн тарта киргизилет. "Коронавирус Нур-Султан менен Алматы шаарларында катталгандыгына байланыштуу жана вирустун Казакстандын башка аймактарына жайылып кетишин алдын алуу максатында мамлекеттик комиссия кошумча чектөөлөрдү киргизүүнү чечти. Ага ылайык, Нур-Султан менен Алматы карантинге жабылмай болду", - деп айтылат өкмөттүн сайтында.

Эске сала кетсек бүгүн, 17-мартта эртең менен Казакстанда вируска кабылгандардын саны 13 болчу. Эми ооругандардын жалпы саны тез эле 27ге жетти. Алардын 16сы Нур-Султанда болсо, 11и Алматыда. Кийинки 14 адам коронавирусту кайдан жуктуруп алганы азырынча белгисиз.

Булак: NazarNews.kg