“Коопсуз шаар” боюнча кайра тендер жарыяланды

Журналист: NAZARNEWS

25.08.2018, 23:42

17739

саясат

“Коопсуз шаар” боюнча тендер кечээ кайра жарыяланды, сунуштамалар 4-сентябрга чейин кабыл алынат. Тендерди Маалыматтык технологиялар жана байланыш боюнча мамлекеттик комитет жарыялап, баштапкы баасы 2 млрд 552 млн 706 миң 240 сомду түзөт. Тендер 2 лоттон турат – адистештирилген техникалык каражаттардын жардамы менен топтолгон жол кыймылынын эрежелерин бузууларды каттоо, транспорттук агым жана видеобайкоолор боюнча комплекстүү маалыматтарды автоматтык түрдө берүү кызматын сатып алат.

Буга чейинки тендер системадагы техникалык каталардан улам бузулган болчу. Ага катышкан “Мега-Лайн” компаниясы тендердин суммасынан ондогон эсе көп сумманы көрсөткөн – катышуучунун сунуштаган баасы 50,5 млрд сомду түзгөн. Муну мамлекеттик сатып алуулар департаментинин директору Улан Озумбеков тендерди бузуу аракети катары баалады.

“Мега-Лайн” ЖЧКсы радиобайланыш тармагында ишмердик жүргүзгөн компания, 2012-жылы түзүлгөн. 2015-жылдын башында 8,5 млн сом салыкты төлөөдөн качуу аракети аныкталып, фискалдык органдар тарабынан чаралар көрүлгөн.

Булак: NazarNews.kg