Ошто эркек киши төрт жаштагы кызды чечиндирип, коомдук транспортто зордуктоого аракет кылган. Бул тууралуу соттун өкүмүндө айтылат.

Белгиленгендей, 2020-жылдын 9-мартында саат 16:00 чамасында жубайлар С.Б. жана З.А. 2016-жылы туулган кызы менен бирге Ош шаарындагы базарлардын бирине келишкен, ал жерде соода кылып бүткөндөн кийин, үйүнө барыш үчүн коомдук транспортко келишкен.

Коомдук транспорттун жүк салуучу жагына базардан сатып алган буюмдарды салып жатканда, кызы унаанын арткы орундукка, кишинин жанына отурган. 

“Мен коомдук транспорттун ичине кирип, кызымдын шымынын түшүп калганын көрдүм, ал белгисиз кишинин тизесинде отуруптур. Мен дароо күйөөмдү чакырдым, ал болсо милицияны чакырды. Ошол кезде ал качып кетүүгө аракет кылган, бирок милиция кызматкерлери аны кармап калышты”, – деди кыздын апасы.

Ал белгилегендей, кызы үйүнө барганда болгон окуянын баарын айтып берген. Кыздын айтымында, унаадагы киши өзүнүн жыныстык мүчөсүн кызга карматып, аны өбүүгө мажбур кылган.

Соттолуучунун өзү жашы жете электерге карата сексуалдык мүнөздөгү аракеттерге мажбурлоого катышкандыгын четке какты.

“Мен коомдук транспорттун ичинде отурган элем, андан кийин кичинекей бир кыз келди. Мен аны тиземе отургузуп, бетинен өөп койдум. Анткени ал жалгыз болчу, коркот деп ойлодум. Андан кийин адамдар кыйкырып, мени бузукулук кылган деп айыпташты. Соттон мени акташын өтүнөм”, – деди соттолуучу.

Сот тараптардын сөзүн угуп, иштин материалдарын карап чыккандан кийин, соттолуучуну күнөөлүү деп таап, аны Кылмыш-жаза кодексинин “Сексуалдык мүнөздөгү аракеттерге мажбурлоо” беренеси боюнча беш жылга эркинен ажыратуу өкүмүн чыгарды.

Булак: NazarNews.kg