Коронавирус Россияга жетти. 26 адам карантинге алынды

Журналист: NAZARNEWS

02.03.2020, 20:45

20016

дүйнө жүзүндө

Санк-Петербург шаарындагы Боткин атындагы ооруканага 26 адам коронавируска шектелип жаткырылды. Бул тууралуу “Российская газета” басылмасына таянып, Lenta.ru билдирди.

Маалыматка ылайык, шектүүлөрдүн бары карантинге алынды. Бир адамды ооруканага жаткыруу үчүн атайын койка керектелген. Себеби, ооруканада вирус жуктургандарга атайын 25 койка дайындалган.

Мындан сырткары, бардык бейтаптардан респиратордук жугуштуу оорулардын белгилери чыккан. Карантинге алынгандар коронавирус оорусу жүрүп жаткан өлкөлөрдөн келишкен.

1-мартта Россиянын жараны Давид Беров Италиядан Москвага келип, коронавирус оорусуна шектелген. Анын диагнозун 2-мартта тастыкташкан. Биринчи Москванын №1 жугуштуу оорулар ооруканасынан тастыкташып, андан кийин акыркы жыйынтыкты чыгаруу үчүн анализди Новосибирскдеги “Вектор” борборуна жөнөтүшкөн.

Акыркы расмий маалыматтар боюнча, дүйнө жүзүндө коронавирус оорусу менен 89 миңден ашуун адам ооруп жатат. Алардын 3 миңден ашууну каза болуп, 45 миң адам айыккан. Коронавирус оорусу Кытайдан башка дагы 60 га жакын мамлекетке тараган.

Булак: NazarNews.kg